La Conseyería d’Educación publicó un calendariu coles convocatories del personal interín que, per primer vegada, toma tol cursu escolar. Les axudicaciones ordinaries van realizase tolos martes non festivos y, con calter estraordinariu, cuando surdan necesidaes imprevistes. El cronograma podría sufrir dalguna alteración por causes sobreveníes qu’aconseyen el so cambéu, pero los cambeos van comunicase con antelación abondo.
La Dirección Xeneral de Personal Docente ellaborara per primer vegada’l cursu pasáu un calendariu de convocatories ente xineru y xunu. Anguaño dio un pasu más, al amplialo a tol cursu escolar, en cumplimientu del compromisu adquiríu pola conseyería. L’oxetivu ye apurrir la máxima estabilidá al colectivu interín y facilitar tamién la organización de los mesmos centros docentes.
El cronograma inclúi 33 convocatories selmanales, tolos martes hasta’l 6 de xunu, sacante los festivos (1 de payares y 6 d’avientu), dos martes de les vacaciones navidiegues (27 d’avientu y 3 de xineru) y el 4 d’abril de 2023, que coincide cola Selmana Santa, anque sí va haber convocatoria’l martes siguiente, 11 d’abril. La única salvedá ye la última selmana de mayu, que la convocatoria va adelantrase al llunes 29 pa nun coincidir col Martes de Campu.
La incorporación efectiva del profesoráu a los centros va realizase, con calter xeneral, el llunes de la selmana siguiente a cada convocatoria, sacante que se trate d’un día non lectivu. Nesi casu, produciráse nel primer lectivu siguiente.
El calendariu completu axústase al alcuerdu de la mesa sectorial de negociación de personal docente –ratificao pol Conseyu de Gobiernu en mayu de 2014- p’ameyorar les condiciones de trabayu y el sistema d’ellaboración, xestión y funcionamientu de les llistes d’aspirantes a interinidá na función pública docente.
