La Conseyería d’Educación recibió 6.853 solicitúes pa cubrir les 479 places ufiertaes nel procedimientu selectivu estraordinariu de estabilización por concursu-oposición del cuerpu de maestros. Esos pidimientos correspóndense con 5.957 persones, por cuenta de que dalgunes opten a más d’una especialidá.
Les dos disciplines con mayor demanda son Infantil, con 1.923 pidimientos pa 95 places, y Primaria, con 1.726 solicitúes pa 142; siguíes por Pedagoxía Terapéutica, con 992 pidimientos pa 71; Inglés, con 757 solicitúes pa 70; Audición y Llinguaxe, con 641 pidimientos pa 22; Educación Física, con 633 solicitúes pa 57, y Música, con 251 pidimientos pa 22 places.
La Conseyería d’Educación punxo en marcha va unes selmanes un órganu técnicu de coordinación presidíu pol director xeneral de Personal Docente, César González, que se va encargar de constituyir los tribunales y d’escoyer les sedes para les pruebes, ente otros aspectos. Los tribunales van tar integraos por cinco funcionarios de carrera n’activu y la mayoría tendrán de ser docentes de la mesma especialidá oxetu de la prueba. El númberu de tribunales va depender de la cifra d’aspirantes per cada especialidá.
Les pruebes van celebrase en xunu de 2024 y la conseyería pretende que tol procesu tea rematáu a mediaos de xunetu.
Eses pruebes nun van tener calter eliminatoriu y van estremase en dos partes: un tema por escritu y la presentación de la unidá didáctica. Dambes van puntuar por igual. Les persones aspirantes van disponer de dos hores pa desenvolver la tema y 50 minutos pa la unidá didáctica, distribuyíos ente preparación (5 minutos), esposición (30) y defensa (15).
Pa la calificación final, la fase d’oposición supón el 60% y la fase de concursu, el 40% restante, según el baremu de la convocatoria. Na fase d’oposición ye imprescindible llograr una calificación mínima de 5 puntos p’aportar al concursu. Amás, pa llograr la nota máxima por esperiencia tienen d’acreditase diez años na especialidá a la que s’opta.
Interinidá al rodiu del 8%
Una vegada remate la estabilización d’estes 479 places del cuerpu de maestros, Educación envalora que la tasa d’interinidá va quedar al rodiu del 8%, que yera l’oxetivu establecíu tanto pol Gobiernu d’España como pol d’Asturies.
Los procedimientos de estabilización docente -qu’empecipiaron n’avientu de 2022- van consolidar en total 1.562 puestos que taben ocupaos por profesoráu interín. Estes places axustáronse dientro d’una ufierta estraordinaria d’empléu públicu pa tola Alministración, que cuntó cola aprobación d’UXT, CC.OO. y CSIF.
