La Conseyería d’Educación ta rematando’l cambéu del decretu d’Infantil pa introducir per primer vegada la enseñanza del asturianu y l’eonaviegu nel segundu ciclu d’esta etapa. Asina-y lo treslladó güei la conseyera d’Educación, Eva Ledo, al presidente de l’Academia de la Llingua Asturiana, Xosé Antón González Riaño, con quien repasó distintos asuntos d’interés común. Ledo calificó la xunta -a la que tamién asistió la directora xeneral d’Inclusión Educativa y Ordenación, María Dolores Bueno- de “cordial, distendida y, sobre manera, bien constructiva”.
Esti novedosu acercamientu a les llingües autóctones n’Infantil va realizase dientro de Comunicación y representación de la realidá, una de les trés árees d’aprendizaxe esistentes nesa etapa, y va tener un calter voluntariu pal alumnáu, tal que preve la Llei 1/1998, de 23 de marzu, d’usu y promoción del asturianu. Sicasí, tolos centros qu’impartan el segundu ciclu d’Infantil van tar obligaos a ufiertalo. La conseyera informó que, tres un primer sondéu realizáu nos centros d’enseñanza, la matriculación supera’l 60% ente l’alumnáu de los colexos públicos.
Ledo comprometióse, amás, a siguir trabayando dende l’alministración na promoción de la llingua asturiana y asina lo comunicará nes xuntes que va caltener a primeros de setiembre coles direcciones de los centros. Tamién va impulsar la divulgación de distintos materiales pedagóxicos.
Otru asuntu tratáu afecta al profesoráu d’eonaviegu. La conseyera y el presidente de l’Academia alcordaron buscar llinies de collaboración pa entainar la dotación de profesoráu naquellos centros onde esistan necesidaes de docentes.
Ledo informó tamién a González Riaño que’l Gobiernu volverá solicitar al Ministeriu d’Educación, Formación Profesional y Deportes la especialidá docente d’asturianu, una histórica aspiración de la conseyería y del profesoráu que sigue ensin materializase al nun ser una llingua oficial. La iniciativa de volver solicitar la reconocencia de la especialidá docente figura nel pactu Asturies Educa, robláu pol Gobiernu con cuatro organizaciones sindicales.
