La Conseyería d’Educación empecipió’l programa de formación permanente del profesoráu d’enseñances non universitaries, que va ufiertar mientres esti cursu 16.000 places. El primer trimestre empezó con 41 actividaes, 4.200 places de formación xeneral y otres de proyectos de formación en centros, que tán abiertes a tol colectivu docente y van empecipiase a principios de payares.
Los conteníos a los que se va dar prioridá son aquellos venceyaos a la implantación de la nueva llei educativa (LOMLOE), la competencia dixital docente, la equidá y les metodoloxíes propies de los programes billingües. La duración de les actividaes va ser bien variable.
Una de les singularidaes de la ufierta va ser la denominada formación en cascada, na que quien reciben les enseñances conviértense dempués en docentes d’otros compañeros. El programa va llograr que, nun periodu bien curtiu de tiempu, tolos centros d’enseñanza tengan siquier dos persones con formación específica sobre la LOMLOE.
La programación combina la formación presencial coles modalidaes en rede y semipresenciales. La formación presencial va impartir nel ámbitu xeográficu de los cuatro Centros del Profesoráu y Recursos (CPR): Avilés-Occidente, Uviéu, Cuenques y Xixón-Oriente.
Tamién s’ufierten redes de formación intercentro y formación de sofitu a l’acción educativa, que se compon de cursos, rutes, itinerarios, seminarios y grupos de trabayu. Coles mesmes, prevense otres iniciatives como conferencies, xornaes o seminarios interactivos.
La formación permanente pal cursu 2022-2023 s’estructura en nueve llínees: LOMLOE, proyectos billingües, equidá ya inclusión, igualdá, salú, sostenibilidá y convivencia; direcciones de centros, competencia dixital docente, prevención de dificultaes d’aprendizaxe y arriquecimientu curricular y Formación Profesional (FP).
Ente les actividaes programaes figuren conteníos de lideralgu pedagóxicu, metodoloxía d’enseñanza billingüe, de diversificación, igualdá, identificación y prevención de la violencia de xéneru, prevención del ciberacoso o de les adicciones o formación en competencies directives. La última incorporación ye un taller de sensibilización énte’l cáncer infantil dende una perspectiva pedagóxica.
A toa esta ufierta súmense les acciones específiques pa la FP, que se tán peracabando y van publicase la próxima selmana.
