La Conseyería d’Educación convoca nuevos cursos de los trés primeros niveles de competencia dixital docente (A1, A2 y B1), dirixíos a profesoráu n’activu en centros sosteníos con fondos públicos. La ufierta suma un total de 8.000 places.
La inscripción ta abierta hasta’l próximu miércoles, día 17, a les 23:45 hores. Los trés cursos van desenvolvese ente’l 27 de febreru y el 31 de mayu en distintes modalidaes.
El cursu A1, de iniciación, va ser semipresencial y consta de 40 hores –qu’equivalen a cuatro creitos-, de les que nueve van ser presenciales y d’asistencia obligatoria y les 31 restantes, al traviés de la plataforma Teams. La ufierta ye de 2.000 places y los grupos van entamar en función de la demanda y les localidaes que s’indiquen al formalizar la inscripción.
El cursu A2, con una ufierta total de 2.000 places, va impartise tantu de manera virtual como semipresencial. En dambos casos la formación va durar 50 hores, equivalentes a cinco creitos. La segunda opción componse de nueve hores presenciales d’obligada asistencia y 41 hores virtuales nel Campus de Formación del Profesoráu.
A lo último, el cursu B1 va ser íntegramente virtual, al traviés del mentáu campus. Consta de 70 hores, equivalentes a siete creitos, y va ufiertase un máximu de 4.000 places.
Estos cursos tomen como referencia l’alcuerdu de la Conferencia Sectorial d’Educación, de marzu de 2022, y los apartaos relativos al programa pa la meyora de la competencia dixital educativa CompDigEdu. Hasta agora, impartióse formación a casi 6.000 docentes y l’oxetivu ye llegar a 11.000 pa 2025.
