La Conseyería d’Educación va asumir les obligaciones cola Seguridá Social del alumnáu de centros públicos que realice práctiques formatives non remuneraes n’empreses. El Gobiernu va cumplir asina con una disposición adicional del testu refundíu de la Llei Xeneral de la Seguridá Social, que va entrar a valir el 1 de xineru de 2024.
Según ese cambéu lexislativu, los estudiantes que lleven a cabu eses práctiques van quedar asimilaos a trabayadores per cuenta ayena nel Réxime Xeneral de la Seguridá Social, con esclusión de los sistemes especiales. Hai una escepción coles práctiques a bordu d’embarcaciones, que se van incluyir nel Réxime Especial de la Seguridá Social de el Trabayadores del Mar.
La conseyería va encargase, por tanto, de realizar tola tramitación alministrativa de les altes na Seguridá Social, incluyíes les xestiones que traigan les situaciones de baxa por incapacidá transitoria. Al respective de les cotizaciones, la mesma Seguridá Social va bonificar el 95% del costu y prevese que’l Ministeriu d’Educación, Formación Profesional y Deportes sufrague’l 5% restante.
Nel casu del alumnáu de centros públicos dependientes de la Conseyería, la midida va afectar a estudiantes de Formación Profesional que realicen la denominada formación en centros de trabayu (FCT) y a les práctiques correspondientes a les Enseñances Artístiques.
La directora xeneral de Centros, Rede 0-3 y Enseñances Profesionales, Eva Ledo, comunicó el pasáu xueves a los centros educativos públicos la decisión de la conseyería d’asumir toles obligaciones cola Seguridá Social del alumnáu en práctiques non remuneraes.
