La Conseyería d’Educación va introducir la enseñanza d’asturianu y eonaviego nes escueles oficiales d’idiomes a partir del cursu 2025-2026. La titular d’esti departamentu, Lydia Espina, anunció güei esta decisión mientres la so comparecencia na Xunta Xeneral, na qu’avanzó tamién otres midíes pa promover l’aprendizaxe y usu de la llingua autóctona, unu de los oxetivos incluyíos na circular d’entamu de cursu.
Asina, informó de que la Dirección Xeneral d’Inclusión Educativa y Ordenación plania yá’l desenvolvimientu curricular para enllantar estes enseñances nes escueles d’idiomes. “Vamos ufiertar asturianu y eonaviego, al igual que faemos col inglés, francés, alemán o italianu, cola única salvedá de que la certificación que vamos poder emitir, al nun ser una llingua cooficial, ye una certificación propia”, esplicó.
Poro, les persones comenenciudes van poder llograr la mesma certificación de llingua asturiana que se vien concediendo dende l’añu 2020 por aciu les pruebes llibres, pero cola ventaya de qu’agora van recibir la formación necesaria para consiguila. “Creo, bonalmente, qu’esti ye un pasu bien importante na enseñanza de la llingua asturiana”, resaltó Espina.
La conseyera tamién avanzó qu’el so departamentu va recuperar la Axenda didáctica escolar dientro de la estratexa xeneral para la promoción y normalización de les llingües propies nel sistema educativu. Esti programa, que s’atayó nel cursu 2017-2018, consistía nuna serie d’actividaes culturales empobinaes a ampliar l’aprendizaxe del asturianu y el eonaviego por aciu acciones complementaries en distintos contestos.
Espina reconoció que l’axenda “yera un escelente recursu”. Sicasí, precisó que la recuperación d’esta iniciativa nun implica que “vaya a ser idéntica y entamada de la mesma manera, sinón que tien de recuperar el so espíritu, porque dexó una bon alcordanza ente la comunidá educativa”.
Otra novedá empobinada a los centros va ser la creación d’un sellu d’excelencia, a partir del cursu 2024-2025, pa estremar a aquellos colexos o institutos que trabayen en proyectos d’innovación venceyaos cola llingua asturiana. Esi sellu va tar dotáu con una cantidá económica pa desenvolver actividaes y tamién va dexar reconocer el compromisu cola enseñanza del asturianu, según precisó la conseyera.
