La Conseyería d’Educación va sovencionar la creación de 318 nueves places n’once escueles de primer ciclu d’Educación Infantil (de 0 a 3 años) pertenecientes a diez conceyos. La Dirección Xeneral de Planificación ya Infraestructures Educatives robló’l resolvimientu definitivu de concesión de les ayudes, qu’impliquen una inversión global de 1,83 millones.
El Principáu promovió per primer vegada una llínea de subvenciones, con cargu al Plan de Recuperación, Tresformamientu y Resiliencia, pa financiar la inversión que realicen los conceyos na estensión de la rede d’escueles d’Infantil. Los conceyos beneficiarios son Xixón, Proaza, Castropol, Gozón, Cabranes, Ponga, Somiedu, A Veiga y Villaviciosa (esti postreru recibe ayuda para dos escueles: La Oliva y Venta les Ranes). En total, van crease 21 nueves unidaes.
Respectu al restu de conceyos que se presentaron a la convocatoria, ocho (Coaña, Grau, Grandas de Salime, L.lena, Navia, Pravia, Santalla d’Ozcos y Valdés) arrenunciaron o quedaron escluyíos al nun poder iguar les observaciones realizaes pola comisión de valoración, magar dalgunos yá manifestaron la so intención d’allegar a la próxima convocatoria de 2023. Otros 16 conceyos treslladaron tamién ese mesmu interés a la conseyería.
El programa d’impulsu a la escolarización nel primer ciclu d’Infantil contemplaba trés modalidaes de subvenciones destinaes a la creación de nueves places: ayudes pa obres de construcción d’un nuevu edificiu o rehabilitación integral d’un inmueble; pa l’ampliación esterior d’aules n’edificios yá esistentes, y pa obres interiores d’adaptación de centros en funcionamientu.
Les ayudes pretenden impulsar y estender la rede asturiana d’escueles infantiles, formada na actualidá por 72 centros que suman 4.197 places distribuyíes en 44 conceyos. Los criterios de valoración priorizaben les ayudes a la población de 1 y 2 años, l’amenorgamientu de les llistes d’espera y l’allugamientu de les escueles n’árees rurales o zones en riesgu de probeza.
La Conferencia Sectorial d’Educación asignó a Asturies un creitu de 13,3 millones para crear 1.300 places de 0 a 3 años hasta setiembre de 2024.
