La Conseyería d’Educación ve viable’l treslláu por fases del alumnáu del Colexu San Vicente de Paúl, que’l so edificiu sufrió daños de considerancia nun esbarrumbe’l pasáu 5 de xineru, al Patronatu San José. El Gobiernu d’Asturies coordina les actuaciones y los plazos del procedimientu cola Fundación Educere, qu’ostenta la titularidá del centru.
El Principáu va empecipiar nos próximos díes el procedimientu pa la execución del treslláu. Trátase d’un trámite que se denomina xurídicamente Resolvimientu de revocación de l’autorización d’enseñances y que tien como oxetivu autorizar de manera escepcional l’actividá lectiva presencial del Colexu San Vicente de Paúl nel Patronatu San José mientres l’actual cursu lectivu.
La Fundación Educere tendrá de presentar la documentación necesaria na que s’esplique de manera detallada tolos pasos que va dar, dende la manera en que se va entamar al alumnáu hasta’l númberu d’unidaes que va allugar nes aules modulares, el proyectu d’instalación y, inclusive, les feches qu’embaraxa. Tamién va tener qu’axuntar los correspondientes proyectos.
La conseyería, amás, va encamentar a la fundación titular del colexu a que les etapes d’enseñanza obligatoria pasen a manera presencial cola mayor celeridad posible.
L’equipu multidisciplinar entamáu por Educación ufiertóse a collaborar tantu cola fundación como cola dirección del Colexu San Vicente de Paúl en toos aquellos aspeutos que consideren necesarios.
