El 97,5% de les 240 residencies de persones mayores d'Asturies ta llibre de coronavirus

El 97,5% de les 240 residencies de mayores d’Asturies ta llibre de coronavirus. Esto supón que na gran mayoría de los centros nun hai nengún residente afectáu pola enfermedá. Los datos publicaos esti domingu revelen qu’anguaño son namás 6 los equipamientos con casos positivos, con diez persones infectaes. La conseyera de Derechos Sociales y Bientar, Melania Álvarez, cree qu’esta situación apunta a “la esperanza”, pero apela a la unidá la ciudadanía “pa siguir enfrentando la crisis y les sos consecuencies dende la máxima prudencia”. “El virus nun se foi y nun vamos baxar la guardia”, aseguró.

Álvarez fizo estes declaraciones na Comisión de Derechos Sociales y Bientar de la Xunta Xeneral, na que compareció pa informar sobre los protocolos adoptaos nos centros de mayores pa torgar l’andanciu. “Trabayemos dende l’anticipación y con total tresparencia, siempres de la mano de la Conseyería de Salú. La coordinación sociosanitaria nun ta solo afigurada nun papel, sinón que ye un engranaxe que funciona y da respuestes”, esplicó.

Amás, destacó que n’Asturies “nun hai llínees coloraes” y que toles persones mayores «tienen derechu a lluchar pola so vida». Tamién recordó qu’el 81% de los residentes que nun pudieron superar la infección finaron n’hospitales. “Otres persones afectaes yá tán de vuelta nos sos llares, que son les residencies. Dalgunes superaron la enfermedá con más de 95 años”, añaºdió.

La titular de Derechos Sociales llamentó que, magar “los esfuerzos llevaos a cabu pa desaniciar los efectos del virus”, produxérense fallecimientos de persones mayores “que provoquen un fondu dolor”. “Sicasí, esta crisis demostrónos que tamos más preparaos pa siguir llibrando batalles, porque nestos casi trés meses aprendimos enforma”, indicó.

Compromisu políticu

La conseyera solicitó a los grupos políticos de la Xunta Xeneral qu’amuesen “compromisu, altor de mires y responsabilidá” pa encarar la crisis sanitaria y les sos consecuencies. “Somos parte d’una xeneración que creció amparada nel enfotu de los nuesos padres y les nueses madres por superar la vida que conocieren. Vivimos la construcción d’un estáu de bienestar, que nun sería posible ensin l’arrogancia d’una sociedá moderna que supo encarar la transición democrática dende l’altor de mires y l’unidá”, afirmó. Al so xuiciu, ye necesariu tomar exemplu de les xeneraciones anteriores pa tar al altor nestos momentos.