La Dirección Xeneral de Mocedá robló un conveniu de collaboración cola Unión de Comerciantes d’Asturies que va dexar a los menores de 30 años que seyan titulares del Carné xoven llograr ventayes y descuentos en más d’un centenar de comercios. Con esti nuevu alcuerdu, son yá más de 60.000 los espacios en toa Europa nos que los asturianos y asturianes van poder adquirir beneficios.
“Pa nós ye fundamental la collaboración públicu-privada y la coordinación col restu de conseyeríes, porque les polítiques de mocedá tienen de ser una exa tresversal nes polítiques del Gobiernu asturianu. Esta tresversalidá ye, ensin dulda, unu de los grandes oxetivos de llexislatura”, esplicó la viceconseyera mientres l’actu. Beatriz González Prieto tamién fixo mención al papel fundamental” que desenvuelve la Unión de Comerciantes “nel fomentu y sofitu del pequeñu comerciu na sociedá asturiana”.
El director de Mocedá entiende qu’esti alcuerdu “supon una importante apuesta por una sociedá asturiana integrada ya integradora”. “Dende Mocedá queremos apostar pol comerciu de barriu, que ye’l que conecta a les persones, frente a otros modelos de calter impersonal”, afirmó Francisco de Asís Fernández, quien considera primordial sofitar “los productos autóctonos, que dan vida a distribuidores locales y a la población asturiana, amás de ser más sostenible”.
Fernández tamién adelantró que la intención del departamentu que dirixe ye la de “siguir aumentando’l catálogu de provisores, implementando la collaboración con entidaes que promocionen el deporte y les actividaes al campu”.
Pela so parte, el director de Comerciu destacó que “frutu de la collaboración y cooperación del Gobiernu col sector comercial los mozos asturianos con carné xoven van poder averase al comerciu físicu asturianu, onde la so seña d’identidá ye la profesionalidá, la especialización y la calidá. Toos ganamos porque se xenera beneficiu económicu y beneficiu social”.
