El Gobiernu d’Asturies va destinar 1,4 millones de fondos europeos a l’ampliación del pioneru Centru de Crisis para Víctimes d’Agresiones Sexuales nel chalé de los Figaredo, en Mieres. El conceyu aprobó la pasada selmana la cesión del inmueble, allugáu nuna localización estratéxica de la zona central asturiana, que va dexar amontar los servicios qu’empresta l’equipamientu con formación, terapies grupales y un espaciu habitacional envernada pa les víctimes que la precisen.
La directora xeneral d’Igualdá, Nuria Varela, presentó güei el plan pal centru xuntu col alcalde de Mieres, Aníbal Vázquez, y les conceyales d’Igualdá, Nuria Ordóñez, y de Derechos Sociales, Teresa Iglesias. “Quiero estimar la cesión al conceyu. Ye un llugar aparente, porque nos dexa movenos en pocu tiempu a cualquier puntu d’Asturies y, amás, ye un inmueble emblemáticu y bien afayadizu, porque los espacios tamién pueden ser terapéuticos”, resaltó.
Tres la formalización de la cesión que güei se presentó, Igualdá va sacar a llicitación les obres d’adecuación del edificiu, que se van allargar mientres el próximu añu. Estos trabayos van incluyir la habilitación d’un espaciu residencial envernada pa les víctimes. “Hasta agora, cuntábamos con un llugar na Casa Malva p’aquelles muyeres que la precisaren. Nestos dos años, atopemos, por casu, con dalgún casu de moces afrellaes polos sos compañeru de pisos. Lóxicamente, eses moces nun pueden volver a les sos cases y por ello vamos habilitar esti espaciu propiu”, esplicó Varela.
Dende la puesta en marcha del recursu abriéronse 300 espedientes a muyeres que cumplíen criterios d’intervención n’el mesmu centru de crisis: 247 mayores d’edá y 53 menores.
L’equipamientu pioneru entró en funcionamientu en payares de 2020 coles mires d’ufiertar acompañamientu afechu a les demandes, necesidaes y tiempos de cada usuaria. D’esta miente, el centru cunta con un equipu de siete psicólogues y siete abogaes, amás de la coordinadora. Como novedá, va dos meses incorporó un equipu esclusivu p’atender a les víctimes menores d’edá, formáu por una psicóloga y una abogada.
Amás, ta preparáu para asistir a muyeres con discapacidá física ya intelectual y dispon tamién d’un serviciu de traducción, tantu pa usuaries inmigrantes como pa turistes y viaxeres que precisen aportar al serviciu.
Nos dos años de funcionamientu del recursu, la Dirección Xeneral d’Igualdá impulsó alcuerdos y protocolos colos colexos de l’abogacía d’Uviéu y Xixón, los colexos de procuradoría, los cuerpos y fuerces de seguridá, los servicios sanitarios y los medios de comunicación, col fin d’emprestar una atención integral a les víctimes y ameyorar el tratamientu de les agresiones en prensa, radio y televisión.
