La conseyera d’Educación, Lydia Espina, presentó güei en Xixón el proyectu del futuru Centru d’Innovación en FP d’Asturies, que va allugase na nave diáfana de 1.642 metros cuadraos útiles asitiada na parte posterior de Llaboral Centru d’Arte y Creación Industrial. El diseñu, obra de los arquitectos Macario Luis González y Rogelio Ruiz, tien un presupuestu de 797.615 euros y un plazu d’execución d’ocho meses.
Les obres incluyen tanto l’arreglu de la cubierta del edificiu como del suétanu y l’aprovechamientu de los espacios yá existentes nun llateral. Amás, caltienen la gran nave diáfana central, que va distribuyise n’espacios pa distintos usos por aciu estructures modulares. Esta nave, destinada de primeres a talleres, recupera con esti proyectu la so función docente y tamién el conceptu anovador col que se pensó.
El proyectu respeta la distribución d’espacios en delles altores na zona oeste del inmueble. Nesa zona van habilitase despachos, sales de xuntes, vestuarios, aseos y un área alministrativa. Pa facilitar los desplazamientos ente plantes va reaprovechase’l buecu del antiguu montacargues p’asitiar un ascensor y va ameyorase la escalera existente.
La nave central, formada por un únicu espaciu de grandes dimensiones y con illuminación natural abondo va subdividise, por aciu estructures modulares, en delles zones estremaes —como, por exemplu, un aula zarrada en forma d’elipse— y puestos de trabayu. La distribución va realizase por aciu un moblame llixeru y fácilmente desmontable, lo que va otorgar flexibilidá pa posibles cambeos d’usu.
Les conexones d’eletricidá y telecomunicaciones necesaries pal desenvolvimientu del Centru d’Innovación en FP van conducise mediante canaletes instalaes baxo’l suelu, que tamién respeten la estructura orixinal de la nave.
La conseyera esplicó mientres la presentación del proyectu que l’Alministración educativa tien d’anovar en tecnoloxía. “La cuarta revolución industrial na que yá tamos somorguiaos oblíganos a tresformar los nuestros centros de FP. Tenemos qu’esplegar modelos d’aprendizaxe col focu puestu nel talentu de les persones p’antemananos y dar una respuesta áxil a los retos qu’encara la nuestra sociedá”, señaló
Espina tamién aseguró que’l nuevu centru “va tar alliniáu cola estratexa d’anovación del Principáu porque ye fundamental pa impulsar la creación d’entornos estratéxicos especializaos”.
El modelu de funcionamientu que va desenvolver va ser similar al d’otres comunidaes. Nun se trata d’un centru escolar al usu, sinón d’un espaciu dedicáu a la investigación y a l’actualización de la conocencia.
Los campos nos que se va especializar primeramente son la dixitalización y la industria 4.0. La conseyería optó por estos ámbitos tecnolóxicos al considerar qu’Asturies cunta con empreses con conocencia y esperiencia abonda pa sumase a la iniciativa y exercer un efectu tractor n’actividaes vinculaes a l’automatización, la sensórica y la conectividá y instrumentación industrial.
