El Conceyu aprueba una nueva ayuda de 120 euros pa families con beques comedor

Van destinase 322.080 euros que van beneficiar a 2.054 families y 2.684 menores

0
535

El Conceyu de Xixón, al traviés de la Fundación Municipal de Servicios Sociales, aprobó una nueva ayuda de 120 euros pa neños con beca comedor. En total, van destinase 322.080 euros que van beneficiar a 2.054 families y 2.684 menores. La midida, que s’articula coles mires de desaniciar los efectos de l’ausencia de serviciu de comedores escolares, va empezar a abonase’l martes 26 de mayu. Espérase que llegue a la totalidá de les sos destinatarios a lo llargo de la próxima selmana. Los beneficiarios nun van tener que realizar nengún trámite pa recibila cuidao que, nesta ocasión, la Fundación yá cunta con tolos datos necesarios pa facer el pagu.

La conceyala de Bientar Social y Derechos, Natalia González, señaló que se trata d’un sofitu pa que les families más vulnerables puedan sufragar los gastos d’alimentación. Esta ayuda va ser la postrera que se conceda esti cursu. Nun va dir en perxuiciu de que puedan ponese en marcha otres bonificaciones estraordinaries mientres el branu nel casu de que’l programa 11×12 nun cubra toles necesidaes. El cambéu presupuestariu que se va llevar el llunes a la Comisión de Facienda y que se preve aprobar nel próximu Plenu contempla amontar la partida destinada a ayudes complementaries en 650.000 euros.

La Conceyalía ta trabayando yá na nueva convocatoria de beques comedor pal viniente cursu escolar cola cuenta d’afaela a tolos escenarios posibles. Dada la situación d’emerxencia sanitaria producida pol COVID-19, la idea ye prorrogar les beques comedor pal cursu que vien. Namás se va abrir la convocatoria al nuevu alumnáu d’infantil y a aquelles families que nun cuntaren con beca esti cursu y cumplan los requisitos.