El Conceyu entama un estudiu topográficu sobre los fundimientos na Costa

0
582

El Conceyu de Xixón yá ta realizando un estudiu topográficu de les zones de la ciudá afectaes por fundimientos. Trátase de los perfiles topográficos de plaza d’Europa y d’avenida de La Costa colos que s’esamina’l terrén actual respectu al orixinal y la so evolución. L’oxetivu del Gobiernu ye dar respuesta a la molición vecinal sobre’l comportamientu del terrén, faer un siguimientu del mesmu y conocer cuál ye’l motivu de la inestabilidá.

La Conceyalía d’Obres Públiques ta arrexuntando tolos estudios xeotécnicos d’esti sector de la ciudá como los del aparcamientu soterrañu de plaza d’Europa y los qu’ADIF realizó pa desenvolver el proyectu del metrotrén. Esti informe va determinar qué tipu d’estudiu xeotécnicu va ser necesariu realizar. Los trabayos de llevantamientu de les zones fundíes de la plaza d’Europa y de pavimentación n’Avenida de La Costa van executase darréu.

L’alcaldesa de Xixón, Ana González, fai un llamamientu a la tranquilidá. Señala que se tienen referencies de fundimientos nesta zona dende 1989 debíu al componente arenosu del sosuelu, quedando refugada la so relación col túnel del metrotrén.