El Conseyu Asesor de Deportes del Principáu, dependiente de la Conseyería de Cultura, Política Llingüística y Turismu, seleccionó ayeri les candidatures finalistes a los premios Xugamos pola Igualdá. Non al machismu. La Comisión de Muyer, Deporte y Actividá Física d’esti conseyu constitúyese como xuráu y va ser l’órganu encargáu d’elexir a los cinco gallardonaos nos prósimos díes.
Los y las vocales del Conseyu Asesor de Deportes presentaron una serie d’aspirantes a caúna de les cinco categoríes de los premios:
– Premiu Deporte base: optan al gallardón la Federación de Surf, el Club Siero Deportivu Balonmanu y el proyectu de Fomentu y Desarrollu del Baloncestu (Fodeba).
– Premiu Difusión: elixióse como finalista la terna que conformen el Club Uviéu d’Atletismu, el proyectu Activa Asturies y la Federación de Balonceste.
– Premiu Estratexa pola igualdá: opten el Uviéu Moderno C.F., el Real Grupu de Cultura Cuadonga y el Club Patín Solimar.
– Premiu Conciliación: tán nominaos el Club Balonmanu Femenín y la Federación de Baloncestu.
– Premiu Trayectoria: aspiren a esta categoría la deportista de fútbol americanu Sara María Álvarez, la surfista Carmen García López, la atleta Bárbara Camblor, les entrenadores Yolanda Mijares, de baloncestu; María Corral, de voleibol, y Beatriz Álvarez Valderrama, del Fedema, así como les árbitres Paula Acebal, de surf, y Enma Fernández, de ciclismu.
