Hai espacios onde conflún histories, ilusiones, lluz y aliendu. El Coro Joven de Gijón, dirixíu por Santi Novoa (Warcry, Coru Anselmo Solar, profesor de la UP…) ye ún d’ellos. Sentase a esfrutar d’un conciertu d’esti coru ye entrar nuna espiral d’emociones y color. Abríen el shoe del 7 de xineru nel Teatru Xovellanos con “Lean on me”, un clásicu del soul de Bill Withers, porque alma ye lo que tresmite cuando esti tema suena como sonó ayeri’l Xovellanos en voz d’esta formación, que, anque cambie de voces, caltién el so espíritu xenuín.
La tarde siguió a ritmu d’Ed Sheeran, Extremoduro o Radiohead. Especialmente inspirada foi la versión de “Creep” que por más que la la so banda refugue de tocar en directu, ye un tema atemporal que conecta y que, de xuru, se cantó con especial emoción dende los y les
integrantes del coru mozu xixoniegu. Y ye que’l coru tien esi aire de los outsiders del institutu que s’axunten pa facer guapura y resistencia cultural. Toos de negro y colorao, pero caún col so estilu. Ye un coru diversu, onde la mocedá ye relativa, pero onde s’amuesa una vibración de qu’hai una bondá casi inxenua qu’alluma y que fai imposible a quien los ve, nun s’identificar con ellos. Como si d’un capítulu de Glee se tratara, como eses películes o series americanes onde’l talentu acaba ganando a la fuercia bruta y lo mediocre.
El setlist siguió con hits pa tola familia como esi himnu Disney que ye “Sueña” del Jorobado de Notre Dame, una versión fecha con procuru y gustu de “África” de Toto (l’acompañamientu musical de gran calidá tamién ayudó a que saliera tan bien como salió, eso ye cierto) o les alusiones gospel a Sister Act cola interpretación de “Hail Holy Queen”. Y ye que nun puede faltar nun coru d’esti estilu’l sellu gospel y soul, l’influxu afroamericanu del que foi rechazáu y acaba alcanzando escenarios, enllenando teatros dende l’alma y lo auténtico. La historia de la mítica película (sobre manera de la so 2ª parte), bien podría ser la de cualquiera de los integrantes del coru porque sí, hai espacios onde conflún toles histories, onde la lluz acaba por salir alantre y ello ye un aliendu pa toos. Esto ye’l Coru Mozu de Xixón, esto ye lo que-yos fai sentir Santi Novoa. Asina foi la tarde del domingu nel Xovellanos: lluz y aliendu pa salir alantre.
