El presidente d’Asturies anunció que va proponer a la Xunta Xeneral la concesión del títulu de Fíu Adoptivu d’Asturies al diseñador gráficu catalán Arcadi Moradell Bosch, creador del llogu y el lema Asturies Paraísu Natural.
Na inauguración de l’ampliación de les instalaciones del Centru Asturianu de Barcelona, Adrián Barbón recordó que se van cumplir en 2025 los 40 años de la creación de la reconocida imaxe, una alegoría del paisaxe asturianu cola dicotomía mar y monte vistos al traviés de la triple arquería de Santa María del Naranco, iconu del prerrománicu asturianu, y un sol radiante que nos recuerda que non siempres llueve n’Asturies.
Naquel momentu, remembró’l presidente, “Asturies yera una tierra en reconversión, pero güei somos un atractivu turísticu de primer nivel”.
La distinción de Fíu Adoptivu ta acutada pa quien destacaren polos sos servicios en beneficiu de la comunidá autónoma, con independencia del so llugar de nacencia.
