El Gobiernu asturianu prorroga la suspensión d’apertura de cases d’apuestes

La midida va dexar realizar un estudiu de la situación de la ufierta, según la so incidencia sobro los vezos d'ociu

0
680

El Conseyu de Gobiernu decidió esti xueves prorrogar la moratoria vixente pola que se suspendieron les autorizaciones pa l’apertura d’establecimientos de xuegu n’Asturies. L’ampliación va ser d’ocho meses y nun va afectar a aquelles solicitúes anteriores al alcuerdu que suspendió per primer vegada les autorizaciones.

La prórroga foi una propuesta mayoritaria de los miembros del grupu de trabayu designáu pol Conseyu del Xuegu. Esti órganu ta integráu poles alministraciones locales, el colectivu d’adictos al xuegu, el mesmu sector empresarial, sindicatos y l’Alministración autonómica. L’oxetivu ye llevar a cabu la planificación del sector. Dáu’l consensu xeneralizáu sobro la necesidá d’ampliar el plazu de suspensión y a la vista de que la situación que motivó la decisión inicial de suspender nueves autorizaciones caltiense, el Conseyu de Gobiernu alcordó ampliar el plazu por otru idénticu.

Esti nuevu periodu va dexar realizar un estudiu fayadizu de la situación de la ufierta real de xuegu, lo mesmo que de la so incidencia sobro los vezos d’ociu de la ciudadanía, especialmente, nel casu de los mozos. Asturies ye una de les comunidaes autónomes con menor ufierta de xuegu. En total, hai 1 casinu, 6 bingos, 27 salones de xuegu y 9 locales d’apuestes. Amás, el Gobiernu asturianu tien una política de publicidá restrictivo en materia de xuegu y apuestes y un programa de prevención d’adicción al xuegu.