El Gobiernu d’Asturies aprobó güei’l proyectu de Llei de Participación Ciudadana, que va regular per primer vegada de forma integral los preseos d’implicación directa de la ciudadanía nos asuntos públicos autonómicos. L’oxetivu de la iniciativa ye fomentar y facilitar la intervención de la población nel diseñu de les polítiques públiques.
El testu lexislativu, que va empecipiar agora la so tramitación parlamentaria, incorpora preseos hasta agora inéditos. Por casu:
- La posibilidá de realizar consultes ciudadanes que nun tengan calter de referéndums (non referendaries) sobre asuntos d’interés.
- La iniciativa reglamentaria popular, pa lo que s’afita un mínimu de 4.000 firmes.
- La ellaboración de presupuestos participativos autonómicos.
- Los foros y xuraos ciudadanos.
El testu reconoz el derechu a participar nos procesos regulaos pola llei a toles persones mayores de 16 años residentes n’Asturies, incluyíes les estranxeres, asina como a asturianos y asturianes residentes nel esterior y persones movíes temporalmente fora de la comunidá. Tamién establez mecanismos pa reforzar la eficacia de la participación y evitar que quede amenorgada a un trámite formal. Nesti sentíu, obliga a l’Alministración a motivar públicamente les razones cuando refugue propuestes formulaes pola ciudadanía y reconoz el silenciu positivu en determinaos procedimientos impulsaos dende la sociedá civil.
La llei incorpora’l principiu de garantía rural, con midíes específiques p’asegurar la participación de les persones residentes en conceyos rurales o zones de baxa densidá demográfica, lo que va evitar desigualdaes territoriales y va favorecer la descentralización de los procesos participativos.
Otra de les exes de la norma ye la creación del Conseyu de Participación Ciudadana, un órganu asesor, de control y garantía del cumplimientu de los derechos recoyíos nel testu, que va ellaborar informes, encamientos y memories añales sobre’l grau d’aplicación de les polítiques participatives. Tamién se van poner en marcha un Rexistru de Participación Ciudadana y un espaciu dixital de participación como plataforma pública d’información, deliberación y siguimientu de los procesos participativos.
El proyectu lexislativu prevé acciones de formación y sensibilización pa fomentar la cultura participativa, midíes d’accesibilidá física, sensorial, cognitiva y dixital, asina como compensaciones por gastos de desplazamientu derivaos de la participación en procesos promovíos pola Alministración autonómica.
La ellaboración del testu desenvolvióse al traviés d’un ampliu procesu de diálogu. Dende ochobre del 2024 percorriéronse toles contornes d’Asturies y llogróse la implicación de cerca de 700 persones de más de 400 asociaciones. D’esta miente, el procedimientu convirtióse nuna esperiencia amplia, plural y representativa de diferentes sensibilidaes. Esti modelu, que la so metodoloxía y coordinación técnica corrió al cargu de la Universidá d’Uviéu, foi reconocíu internacionalmente nel IX Cume Global de Gobiernu Abiertu, celebrada en Vitoria-Gasteiz nel 2025, como exemplu d’ellaboración colectiva y compromisu democráticu cola sociedá civil.
