El Gobiernu d’Asturies autorizó güei un gastu de 23.447.829 euros pa desdoblar la calzada de la carretera AS-17 (Avilés-Llangréu) entre Bobes y Samiguel, nel conceyu de Siero, concretamente ente los puntos quilométricos 3,6 y 5,5.
Esta actuación, d’importancia vital pa conectar esta zona industrial cola autovía A-64, tien un plazu de 24 meses.
El llargor total del tramu que va cuntar con doble calzada ye de cuasi 1.900 metros, pero la obra va afectar a más de dos quilómetros de vía, al incorporar tamién dellos ramales, conexones y rotondes.
Aparte d’esta actuación, l’Executivu aprobó otres dos partíes pa meyores na rede de carreteres de titularidá autonómica, concretamente na AS-337 y l’AS-343.
Na AS-337, una carretera local de primer orde que xunta les localidaes de Sotrondio, en Samartín del Rei Aurelio, y Figareo, en Mieres, van invertise 1.629.970 euros pa llimpiar y rozar los 26 quilómetros del vial y construyir cinco murios de formigón y trés escolleres. La obra tamién incluye’l fresado del firme y l’aplicación d’una capa nueva de rodadura, amás de la renovación de la señalización. Aparte, na travesía de la localidá de Peñule (Mieres), va recrecese’l firme 50 centímetros pa facilitar la evacuación superficial del agua. Estos llabores tienen un plazu d’execución de 7 meses.
Pela so parte, a l’AS-343, que xunta Puertas (Llanes) con Panes (El Valle Baju de Peñamellera), al traviés del conceyu de Ribadeva, van destinase 731.137 euros p’actuar ente’l principiu del vial y el puntu quilométricu 23,5. La intervención consiste nel arreglu y pavimentáu de 17 fundimientos y la corrección de la rasante en dellos puntos, amás de la reposición de la señalización vertical y horizontal en tol trazáu.
Convocatories del programa Leader
El Conseyu de Gobiernu autorizó un gastu antemanáu de 16,5 millones pa les convocatories d’ayudes del programa Leader del 2022 que xestionen los grupos de desenvolvimientu rural, que garren cuasi tol territoriu asturianu.
Estes subvenciones, cofinanciaes pol Fondu Européu Agrariu de Desenvolvimientu Rural (Feader), dan soporte al texíu productivo y social del mediu rural y garanticen la continuidá de l’actividá nun sector esencial pal suministru d’alimentos a la población.
El presupuestu de les ayudes pal añu que vien consolida l’aumentu del 40 % que yá se produció nesti exerciciu na cuantía de l’ayuda p’autónomos, el conocíu como tique rural, afixada en 35.000 euros.
