La directora xeneral de Memoria Democrática del Gobiernu del Principáu, Begoña Collado, consideró ayeri iniciatives “fundamentales” pa poder avanzar en “la tresmisión de la memoria tantu la Llei nacional de Memoria Democrática, de 2022, como la Llei pa la Recuperación de la Memoria Democrática del Principáu d’Asturies, de 2019. “Son lo que va facer que tengamos les garantíes de la non repetición”, añedió. Sobre este mesmu asuntu, la ex conseyera asturiana y ex diputada Laura González dixo sentise “arguyosa” de vivir nuna sitiu onde “nun cuerre peligru” esta llei autonómica, como asocede n’otres comunidaes.
Begoña Collado realizó estes declaraciones na sablera del Arbeyal, en Xixón, mientres l’actu conmemorativo del 86ª aniversariu de la partida dende’l puertu d’El Musel de los cerca de 1.200 neñes y neñes treslladaos a Rusia coles mires de caltenelos a salvo de los bombardeos franquistes sobre la población civil, acontecimientu que tuvo llugar el 23 de setiembre de 1937. Sobre esa fecha en concretu, Collado recordó que ye’l día que precisamente quixo escoyer l’Executivu autonómicu pa celebrar el Día de la Memoria d’Asturies.
La directora tamién se refirió al actu institucional del Día de la Memoria que tuvo llugar ayeri en Grau, del que sorrayó la importancia de poder llevalo a “tol territoriu” d’Asturies. Coles mesmes, estimó’l llabor de “les asociaciones que lleven tantos años trabayando pa la tresmisión de la memoria”, ente les que citó a les participantes na celebración de güei, como l’asociación Neños de Rusia-Neños de la Guerra, l’Asociación Lázaro Cárdenes y l’Atenéu Obreru de Xixón.
