El Gobiernu d’Asturies va dedicar anguaño’l 8 de marzu (8M), Día Internacional de les Muyeres, al movimientu feminista y la so capacidá de xenerar meyores na llucha pola igualdá. L’Institutu Asturianu de la Muyer escoyó’l lema Esti tren yá nun para, en conmemoración del décimu aniversariu del Tren de la Llibertá, exemplu de la fuerza del movimientu feminista.
La xornada va sirvir pa rindir tributu a la iniciativa, la determinación y la capacidá de convocatoria de dos asociaciones asturianes de muyeres: la Tertulia Feminista Les Comadres, de Xixón, y Muyeres pola Igualdá, de Los Barreros (Llaviana), que fueron capaces d’espertar un movimientu reivindicativu, dientro y fuera d’España, y de movilizar a tola sociedá pa llograr frenar en 2014 la reforma de la llei del albuertu.
La Dirección Xeneral d’Igualdá entamó un ampliu programa d’actividaes pa conmemorar el 8M. L’actu institucional va celebrar na Casa de Cultura de La Pola Llaviana, y tamién va sirvir para homenaxar al Telecable H.oquei Club, equipu femenín qu’acaba de proclamase campeón de la Copa Intercontinental
La programación va empezar el próximu llunes, día 4 de marzu, n’Avilés. En collaboración col conceyu y el IES Carreño Miranda, la Casa de Cultura va acoyer la mesa redonda Industria y muyer, na que van participar la conseyera de Transición Ecolóxica, Industria y Desenvolvimientu Económicu, Nieves Roqueñí; la directora de la biofábrica d’Ence, Mari Luz Sánchez Galán; la coordinadora de la Plataforma Tecnolóxica d’Aceru Español (Platea), Susana Pelegrina, y la directora de Minería Sostenible de ArcelorMittal, Ana Fernández-Iglesias. La periodista Silvia López va moderar l’actu, al que va asistir alumnáu de Bachilleratu del institutu, y col que pretende dase visibilidá a carreres d’ésitu, mesmo que fomentar los oficios científicos ente les nueves.
Pela so parte, el martes 5 de marzu, a les 19:00 hores, va tener llugar na Antigua Escuela de Comerciu de Xixón un coloquiu y la proyección del documental El Tren de la Llibertá, en collaboración col Conceyu de Xixón, el Conseyu d’Asociaciones de Muyeres y los colectivos Muyeres pola Igualdá, de Los Barreros y Tertulia Feminista Les Comadres.
L’actu institucional del 8 de marzu, nel que collabora’l Conceyu de Llaviana, va celebrase a les 12:00 hores na Casa de Cultura de la capital del conceyu y va cuntar cola intervención del presidente, Adrián Barbón.
