El Gobiernu d’Asturies cunta dende güei con un sistema intelixente de monitorización turística, una ferramienta que va axuntar tolos datos y estadístiques relevantes pal sector, de manera que pueda controlase la so evolución na comunidá. La conseyera de Cultura, Política Llingüística y Turismu, Berta Piñán, y la viceconseyera de Turismu, Graciela Blanco, presentaron güei esta web, a la que puede aportase dende’l siguiente enllaz:
www.turismoasturias.es/simta

La nueva plataforma va suponer una inversión global de 600.000 euros financiaos con fondos Next Generation. El portal arrexunta, de manera amigable y accesible, les cifres d’estancies y visites que publica dacuando l’Institutu Nacional d’Estadística (INE), datos de AENA sobro les operaciones aérees realizaes ya información acerca del empléu y les afiliaciones a la Seguridá Social nel sector. Amás, per primer vegada van colgar n’abiertu y arrexuntaos los datos sobro les consultes que reciben les oficines d’información turística y tamién de les rexistraes al traviés de la web de Turismo Asturies y los distintos perfiles de redes sociales.

“Esta ferramienta constitúi un finxu dientro del tresformamientu que ta viviendo’l sector turísticu, porque representa un recursu esencial para cuntar con información oldeada y calidable sobro la so evolución. Ye un preséu clave pa les alministraciones públiques y les empreses, de cara a tomar meyores decisiones pa empobinar la nuesa ufierta como destín”, valoró Berta Piñán.

Desplazamientos internos y ecocontadores

El sistema intelixente de monitorización turística aspira a convertise nun preséu de referencia pa testar la evolución del sector. Asina, ta previsto que s’incorporen llueu nuevos recursos ya información que van permitir saber gracies al big data, por exemplu, qué desplazamientos realicen per Asturies los turistes.

Ente esos nuevos recursos que van amestase figuren los rexistros de visitantes que se van llograr al instalar una rede de ecocontadores en distintos enclaves d’interés. Esti sistema va permitir, por exemplu, conocer cuántes persones cubren les rutes del Camín de Santiago dientro del Principáu. Amás, van añedir al portal los datos de visites a equipamientos culturales.

Análisis de marca

Per otru llau, Graciela Blanco presentó un informe ellaboráu a finales de primavera pola firma Mabrian qu’amuesa la evolución del interés de los turistes por visitar Asturies dende 2019. El documentu reflexa un creciente interés de los viaxeros nacionales sobre Asturies, inclusive percima de la etapa d’enantes del andanciu, y acompañáu por una notable percepción de seguridá y prestu per parte de quien visiten la comunidá.

Esti informe, ellaboráu a partir d’analís conversacionales en redes sociales y de plataformes turístiques dixitales, tamién pon de manifiestu la importancia, cada vez mayor, del productu gastronómicu.

Igualmente, el documentu, que ta disponible pa consulta nel apartáu d’informes de www.turismoasturias.es/simta, fai referencia al destacáu grau de prestu coles infraestructures hoteleres y a la so competitividá en precios en relación col restu de la España Verde.