El gobiernu asturianu punxo en marcha Ruta dixital, un programa innovador p’averar la formación en nueves tecnoloxíes a los conceyos rurales con menos de 20.000 habitantes, col fin de combatir la fienda dixital.
Al traviés d’un conveniu robláu ente la Conseyería Presidencia, Retu Demográficu, Igualdá y Turismu, y la Cámara de Comerciu d’Uviéu y dotáu con 2,4 millones, un aula móvil va movese per 71 conceyos con una ufierta formativa gratuita de cien cursos, caún de siete hores y media de duración, en formatu dixital y online.
L’aula móvil tien un llargor de diez metros a los que se suman dos módulos llaterales estensibles, lo que dexa ufiertar casi 42 metros cuadraos. Amás, cuenta con equipos pa diez alumnos de forma simultánea, accesu a internet d’alta velocidá y un sistema de conexón vía satélite.
La vicepresidenta del gobiernu d’Asturies, Gimena Llamedo, visitó la primer parada, en La Ribera, onde señaló l’importante esfuerzu que ta realizando l’Alministración pa llegar a tolos requexos d’Asturies, smesmo que’l so compromisu col desafíu demográficu, “pa que naide quede tras”.
Llamedo venceyó esta iniciativa al apueste pola simplificación burocrática qu’impulsa l’Executivu autonómicu y que pretende averar l’Alministración a les persones. Un procesu, añedió, nel que llueu va encaxar una nueva pieza: la evolución de la sede lletrónica escontra la nueva plataforma dixital MiPrincipado. “Con ella, vamos poder llevar l’Alministración nel bolsu”, valoró la vicepresidenta, quien amestó qu’esta nueva canal va dexar realizar trámites, pagar tases, consultar carnés o espedientes, too ello ensin pasar por un ventanu.
Respectu al programa Ruta dixital, incidió en que va consistir “en dir pueblu a pueblu dando formación dixital básica a más de 11.000 persones de toles edaes”.
La ufierta formativa dedica un apartáu específicu a la intelixencia artificial (IA), una ferramienta fundamental en tolos ámbitos y pieza clave d’estos cursos. Hai trece títulos nos que se van ufiertar pautes pal usu básicu de la IA nel día a día, la redacción de Prompts, usos prácticos de ChatGPT o cómo crear una identidá de marca con esti tipu de tecnoloxía.
Destaquen tamién los cursos empobinaos a les persones mayores, con conteníos enfocaos a utilidaes como pidir cita previa, xestionar contactos y axustes del móvil, reconocer estafes, unviar audios, compartir imaxes o realizar videollamadas. Coles mesmes, va haber formación pa persones adultes y tamién pa escolares.
Les próximes paraes de Ruta dixital van ser Les Regueres, Candamo, Grau, Tameza, y Salas. El percorríu va siguir con Santo Adriano, Proaza, Teberga, Morcín y Riosa, pa retomar l’actividá en septiembre, cola vuelta al cole.
