El Gobiernu d’Asturies, al traviés del Consorciu de Tresportes d’Asturies (CTA), punxo en serviciu una aplicación gratuita pa teléfonos móviles que va facilitar y va simplificar l’usu de la rede de tresporte públicu na comunidá. La nueva ferramienta puede descargase dende güei nes plataformes para sistemes Android y iOS, introduciendo la busca CTA CONECTA. Esta midida forma parte de la estratexa de la Conseyería de Mediu Rural y Cohesión Territorial pa la modernización y digitalización del tresporte y el fomentu de la movilidá sostenible.
Al traviés de la nueva aplicación CONECTA, los usuarios pueden solicitar yá la nueva tarxeta monederu, utilizando un sistema de reconocencia de documentos y verificación d’identidá. Esta tarxeta va unviase directamente a la casa del solicitante, que va recibir un corréu electrónicu coles claves del área personal onde va poder xestionar les distintes opciones de la cuenta personal.
Pel momentu, esta nueva tarxeta nun va tar operativa, polo que se van siguir utilizando les actuales: bonu 10 y abonu CONECTA, como hasta agora. Sicasí, ye recomendable solicitar yá’l nuevu soporte pa poder empezar a utilizalo en cuanto tea disponible. Cuando la nueva tarxeta reemplace por completu a l’actual, dende l’aplicación CONECTA podrá consultase l’hestóricu de viaxes realizaos o recargar saldu averando la tarxeta al terminal móvil. Sicasí, magar de les nueves posibilidaes qu’ufre esta aplicación móvil, la presencia del asturianu, asina como la de la toponimia, ye nula
