El Gobiernu del Principáu presentó güei al Observatoriu contra la LGTBIfobia el proyectu de Llei de Garantía de los Derechos y Llibertaes del Colectivu LGTBI y les sos families. Esta iniciativa, unu de los compromisos de llexislatura, blinda’l derechu d’estes persones a vivir llibremente la so sexualidá, favorez el so desenvolvimientu plenu y apúrre-yos protección frente a discriminaciones y ataques.

L’Executivu va unviar el testu a la Xunta Xeneral mientres esti mandatu. Asina, va responder a una reivindicación histórica de les persones lesbianes, gais, bisexuales, transexuales y intersexuales: l’adopción de polítiques públiques que garanticen el llibre desenvolvimientu de la so personalidá y torguen cualquier tipu de discriminación, acoso o violencia. Tratar de que nun haya llugar para la impunidá y que sían les persones intolerantes o agresores quien sientan el refugu y la repulsa social poles sos actitúes.

El testu, innovador y con un planteamientu tresversal que toma inclusive l’ociu, el deporte y la situación del mediu rural, va ser aprobáu pol Conseyu de Gobiernu nes próximes selmanes. Ta conformáu por 48 artículos y dalgunos de los sos conteníos más importantes son los siguientes:

  • Desenvolvimientu d’un serviciu d’atención y asesoramientu integral a toles persones que sufrieren o tean en riesgu de sufrir discriminación o violencia per razón de la so orientación sexual y/o identidá sexual. Con esti oxetivu ellaborará la Estratexa asturiana pa la igualdá de tratu y non discriminación. La llei tamién incorpora l’Observatoriu contra la LGTBIfobia.
  • Formación de los emplegaos y emplegaes públiques –n’especial, policías locales, ya integrantes de los servicios de Protección Civil, emerxencies y urxencies- pa garantizar una meyor conocencia y atención al colectivu LGTBI.
  • Ellaboración de conteníos y programes nos centros educativos por que promuevan la igualdá de tratu y la non discriminación.
  • Formación específica del profesional sanitariu. N’especial, pa l’atención a les persones transexuales.
  • Prohibición de cualquier tipu de terapia de conversión y faer publicidá de la mesma.
  • Reconocencia de la heteroxeneidá del fechu familiar.
  • L’anteproyectu tamién regula un réxime d’infracciones y sanciones naquellos casos de discriminación escontra persones LGTBI.