El Principáu asitia a la Universidá d’Uviéu como motor estratéxicu del tresformamientu económico y social d’Asturies. El conseyeru de Ciencia, Empreses, Formación y Empléu, Borja Sánchez, que participó nos actos del Día de la Universidá d’Uviéu na Feria Internacional de Muestres d’Asturies (Fidma), indicó que nesta nueva llexislatura la institución académica va ser unu de les exes fundamentales pa la retención y atracción de talentu.
La Universidá d’Uviéu “concentra les principales exes sobre los que se debe actuar nesta próxima década del cambéu: la educación, la investigación, la innovación y la tresferencia de conocencia”, indicó’l conseyeru.
Sánchez tamién punxo de relieve que’l contratu programa suscritu cola Universidá anguaño garantiza la suficiencia financiera y supunxo xuna inyección bien importante pal presupuestu de la institución.
La Conseyería de Ciencia, Empreses, Formación y Empléu va incidir en programes empecipiaos na anterior llexislatura pa favorecer la incorporación de personal investigador n’Asturies y l’Universidá ye unu de los centros pa captar científicos d’excelencia.
Borja Sánchez indicó que l’Axencia de Ciencia, Competitividá Empresarial y Innovación Asturies (Sekuens) yá ta trabayando nunes nueves bases de convocatories que dexen afitar un calendariu estable y tamién ameyorar dalgunos de los programes pa incorporar investigadores ya investigadores a los nuesos centros.
El conseyeru incidió, amás, na puesta en marcha en próximes feches del centru de emprendimiento amestáu a la intelixencia artificial del Tecnolóxicu de Monterrey, que va cuntar con financiamientu del Ministeriu d’Asuntos Económicos y Tresformamientu Dixital y que va ser xuna referencia n’Europa.
El titular de Ciencia visitó’l estand de la Universidá na Fidma, onde foi recibíu pol rector, Ignacio Villaverde, y asistió a una mesa redonda con titulaos de la institución académica asturiana que trabayen nel estranxeru.
