El Gobiernu d’Asturies ta dispuestu a “llegar hasta’l final” na investigación del casu Blue Solving pa determinar les causes del accidente nel que finaron cinco mineros, en qué circunstancies se produció y si na esplotación allegaba dalguna irregularidá. Belarmina Díaz, conseyera de Transición Ecolóxica, anunció güei que l’Executivu va personase como acusación particular, tal que solicitaren los sindicatos mineros SOMA-FITAG y Comisiones Obreres.
Belarmina Díaz presidió la xunta de la comisión de seguridá minera, un órganu nel que tán representaos l’Alministración autonómica, los sindicatos, les empreses y los colexos profesionales. Al términu d’esti alcuentru, anunció les siguientes decisiones:
• El Gobiernu d’Asturies va personase como acusación particular nel procedimientu xudicial abiertu.
• La Comisión de Seguridá Minera va constituyir una comisión especial d’investigación sobro l’accidente. La primer xunta yá tien fecha: va celebrase’l 25 d’abril. “Vamos poner tolos medios, tolos esfuerzos y tolo que sía necesariu pa determinar lo qu’asocedió”, afirmó Díaz.
• La conseyera va comparecer a pidimientu propiu na Xunta Xeneral pa ufiertar voluntariamente toles esplicaciones al algame del Gobiernu d’Asturies. La solicitú yá foi rexistrada.
• La Inspección Xeneral de Servicios va realizar una evaluación del Serviciu de Mines. L’oxetivu ye chequear toles actuaciones desenvueltes hasta’l momentu y, llegáu’l casu, tomar iniciatives p’ameyoralo.
Estos cuatro midíes van desenvolvese cola mayor rapidez posible. La intención del gobiernu ye impulsar la investigación al máximu. Como afirmó’l presidente, Adrián Barbón, el gobiernu pretende evaluar “de riba abaxo” el funcionamientu de la esplotación, que de nenguna forma podía dedicase a la estracción de carbón. Anque la esperiencia d’otros accidentes constata qu’estos trabayos pueden allargar, la intención del Executivu ye collaborar por que puedan realizase cuanto antes.
La conseyera informó tamién sobre les inspecciones realizaes na mina onde se produció l’accidente. Dende 2022, realizáronse siquier ocho inspecciones; la postrera, en septiembre del añu pasáu. Nenguna d’elles detectó irregularidaes nel pisu terceru, onde se produció l’accidente. La próxima selmana volverá llevase a cabu otra inspección nel llugar del accidente, xunto cola policía xudicial y equipos especiales d’investigación d’esplosivos.
“Ye una traxedia perdura, la más dura que me tocó xestionar nunca en tola mio vida profesional”, sorrayó la conseyera, quien volvió manifestar la so solidaridá coles families y amistaes de los cinco trabayadores finaos y con tola comunidá minera.
