El Lobas Global Atac Team empató nel Florida Arena col Rodríguez Cleba, nun partíu vibrante. L’Equipu uvieín tuvo primero encarrilao l’alcuentru y llueu violo cuasi perdío, llegando a unos últimos minutos d’infartu nos que la balanza pudo desequilibrase pa cualquier llau.
El choque principió con munchos nervios de los dos equipos, sabedores de que, anque la Lliga ta arrancando, el resultáu d’ayeri podría ser perimportante na final de temporada. El Rodríguez Cleba goció de les primeres ventaxes énte un Lobas Global Atac Team en minoría poles dos espulsiones tempraneres. Les carbayones foron engrasando a dulces la defensa hasta que nel minutu 15 Celia Rojo ponía per primer vez per delantre nel marcador (8-7) al cuadru llocal. Inés Suárez, con aciertu na portería, convertíase nun muru pa les llioneses y el cuadru carbayón abría una pequeña brecha (12-9). La cancerbera uvieína completaba unos minutos d’ensueñu y con un gol de portería a portría marcaba’l 14-10 col que remataba la primer parte.
Sicasí, la deriva del partíu torno nel entamu de la segunda parte, con un Rodríguez Cleba que salió munchísimo meyor y que-y cambiaba la cara al marcador namás en 7 minutos (15-16). Manolo Díaz buscaba soluciones, pero el Lobas Global Atac Team nun algamaba tornar al so meyor nivel y les visitantes, con Ania Ramos al mandu, conseguíen la so mayor ventaxa (17-20).
Les llioneses entraben nos últimos nueve minutos con trés goles más na cuenta, nos que’l Lobas Global Atac Team sacó la so casta pa cambiar el resultáu (22-21) con tres goles siguíos de Laura Gutiérrez. Nel últimu minuto, Inés Peralta, del equipu visitante, llanzó fuera y dempués el llanzamientu de Carmen García-Calvo tampoco alcontró bon resultáu na última xugada. Con too, remataba l’alcuentru con un empate (23-23).
Con esti resultáu, ambos equipos queden empataos al frente del grupu A de División d’Honor Plata Femenina, dambes con nueve puntos tres cinco partidos de lliga. L’equipu uvieín malpenes tendrá descansu pa recuperase d’esti alcuentru; el sábadu a les 20:00 vuelve al Florida Arena pa enfrentase al Carballal.
Lobas Global Atac Team (23): Inés Suárez (1), Carmen García-Calvo (3), Flor Villarroel (2), Miriam Cortina (3), Celia Rojo (6), Laura Gutiérrez (4), Marta Fernández (4) -siete inicial-, Elsa Martín, Teresa Rodríguez, Brenda Torres, Niki Blatché, Elena Terrero, Julia Suárez y Alba Peláez.
Rodríguez Cleba (23): Bárbara Seco, Carolina Lorenzo (4), Amagoia Laínez (3), Itahisa Castillo (3), Mireia Díez (5), Inés Peralta (1), Ania Ramos (4) -siete inicial-, Carmen Fernández (1),
Covadonga Alfageme, Paula Alonso (2), Nerea Solares, Clara Carnero, Constanza Díaz, Adriana Muñoz, Lucía López y Alicia Cruz.
Árbitros: Xabier Elizetxea López y Jon Mendizábal Carrera (vascos).
Incidencies: Florida Arena, 350 espectadores.
