El ministru de Cultura, Ernest Urtasun, anunció en Mieres una inversión de 1,1 millones d’euros la segunda fase de rehabilitación del Pozu Santa Bárbara, primer pozu mineru declaráu Bien d’Interés Cultural (BIC) n’España y un referente nel ámbitu de la recuperación y tresformamientu del patrimoniu mineru ya industrial.
El ministru, que na so visita a Asturies fixo la so primer parada en Mieres, destacó que “güei venimos equí pa sofitar la recuperación d’esti pozu Santa Bárbara que ye unu de los
dos grandes proyectos que tien el Plan Nacional de Patrimoniu Industrial y col que’l Ministeriu de Cultura ta dafechu comprometíu”, daqué que s’amuesa col anunciu d’una inversión de 1,1 millones d’euros pa esti y el próximu exerciciu coles mires d’impulsar
les intervenciones necesaries pa siguir recuperando esti espaciu. “¿Por qué queremos
recuperalo? Por dos razones, la primera pola defensa y la recuperación de la memoria de la clase trabayadora, de la minería y lo que significó y la segunda pol apueste pol futuru económicu d’esta zona”, apuntó’l ministru, quien defendió que “les zones mineres tienen futuru económicu a partir de la recuperación d’espacios como esti que tienen que ser auténticos vectores de dinamización económica”.
Unes declaraciones realizaes tres visitar el Pozu Santa Bárbara, nel que tuvo la oportunidá tamién d’esfrutar de la última intervención impulsada pola conceyalía de Cultura nel mesmu, “Visual Bird Sounds”, de Andy Thomas. Nesti marcu, el ministru tuvo tamién unes palabres d’alcordanza y homenaxe a Aníbal Vázquez y valoró el trabayu que dende’l Conceyu de Mieres ta faciéndose nel ámbitu cultural convirtiéndose “nun conceyu de referencia na cultura del nuesu país”, señaló Urtasun, quien fixo referencia non solo al trabayu de tresformamientu del patrimoniu mineru, sinón tamién a otres iniciatives como’l ciclu “Caxa de Resistencia” contra la censura na cultura.
L’alcalde de Mieres, Manuel Ángel Álvarez, estimó al ministru y al so equipu que la primer parada de la so primer visita a Asturies fuera en Mieres, lo que demuestra l’interés que tien pol trabayu realizáu dende’l Conceyu. Una visita qu’en sí mesma ye una declaración espresa de sofitu que’l primer conceyal estimó, más si quepe teniendo en cuenta que’l ministru vieno comprometer inversión para’l Pozu Santa Bárbara y a reforzar la collaboración ente Ministeriu de Cultura y Conceyu de Mieres. “Tenemos un compromisu claru cola cultura y col tresformamientu del patrimoniu n’espaciu de futuru y dinamización territorial”, apuntó l’alcalde, qu’estimó’l sofitu del Ministeriu de Cultura pa siguir avanzando nesti camín.
