A partir d’esti miércoles y mientres tol mes, nel horariu d’apertura del Muséu del Xurásicu d’Asturies, en Colunga, podrá visitase l’amuesa temporal Científiques a conciencia. Al traviés de les ilustraciones realizaes por Vanesa Rovira, podrá conocese la pasión polos fósiles de la paleontóloga Mary Anning, la figura y trayectoria de la bioquímica Margarita Salas y, como novedá, la vida de la paleontóloga Angela Milner, que tien ente los sos mayores llogros el descubrimientu de Baryonyx.
El 6 y 7 de febreru, a les 12:30 hores, habrá una visita guiada pel Muséu centrada na güelga de la muyer na Paleontoloxía y poniendo en valor la importancia de munchos descubrimientos realizaos por muyeres. Esta fin de selmana, a les 11:30 y 16:30 hores, va celebrase’l taller Garres de Baryonyx, nel que’l públicu familiar va afayar la hestoria del descubrimientu d’esti dinosauriu carnívoru y va tener qu’atopar los sos restos, construyir les garres cola técnica del origami y facer un collar de pasta de sal.
Laura Piñuela, xeóloga del equipu científicu del Muséu, va guiar una visita especial p’afayar el MUXA de la so mano’l 13 y 14 de febreru, a les 12:30 hores. Esa fin de selmana tamién se va realizar el taller Zoótropo Baryonyx a les 11:30 y 16:30 hores, una oportunidá pa poner en movimientu con un zoótropu, un tambor circular con ventanes y dibuxos nel so interior, al Baryonyx.
Puede consultase tolos detalles de les actividaes y mercar primeramente les entraes na web www.museojurasicoasturias.com, onde se va comunicar puntualmente cualesquier novedá.
