Aína sigue abriendo camín. Si nes pasaes selmanes el nuevu partíu asturianista y d’izquierdes echara a andar les agrupaciones llocales del Nalón y de Xixón, llega agora’l momentu del oriente asturianu. El xueves 12 de xineru na Casa de la Cultura de L’Infiestu tán llamaes a aconceyar a les 19:00 hores la trentena de persones inscrites nos municipios de Piloña, Villaviciosa, Cabranes, Bimenes, Nava, Parres, Ribeseya y Llanes. L’actu, amás, ta abiertu a tolos y toles habitantes de la fastera oriental d’Asturies que quieran interesase pol proyectu y participar nél. Na asamblea d’esti xueves va haber tiempu pa desplicar y analizar el procesu desendolcáu hasta la fecha por Aína, pa informar sobre’l llabor que ta desenvolviendo la Mesa Nacional Provisional del partíu y, sobre manera, p’aniciar un alderique empobináu a proponer polítiques y formes de trabayu d’interés llocal que sirvan
pa poner los pegoyos de l’aición de cambéu qu’esta formación moza quier entamar a desarrollar nel oriente del país.

Aína naz col convencimientu de que la cercanía tien de ser un de los encontos principales del so facer políticu, que tien ente los sos oxetivos asturianizar la política; señalar y poner igua a les desigualdaes sociales n’Asturies; ufrir una alternativa pa qu’Asturies algame les mayores cotes d’autogobiernu a nivel políticu, económicu y sociocultural, y rexenerar la política asturiana.

Dempués de la bona receptividá de la que gociaron los actos celebraos nel Nalón y en Xixón, Aína, que cuenta con 170 persones inscrites nuna trentena de conceyos asturianos, sigue’l procesu d’activación de les sos primeres organizaciones municipales. D’esti mou, el partíu busca consolidar l’afiliación, aportar a más xente y entamar el so trabayu políticu dende la proximidá. Asina, la formación sigue avanzando pa construyir pasín a pasu un asturianismu modernu, apegáu a la realidá asturiana y con un firme compromisu cola xusticia social, con una economía qu’afite futuru n’Asturies, col feminismu, col territoriu,
colos servicios públicos, cola democracia participativa, colos derechos humanos, col internacionalismu y cola cultura.