El paru xubió en setiembre en Xixón en 622 persones

El sector servicios, con 1.779 demandantes nuevos en setiembre, concentró'l 85,5 % de les inscripciones nueves

0
64

El paru interanual aumentó n’Asturies en setiembre en 2.079 persones (+3,17 %) hasta asitiar en 67.569. Esta medría, como ye habitual, obedez a la finalización de la temporada turística y caltiénse en llinies asemeyaes a exercicios anteriores. Asina, el sector servicios, con 1.779 demandantes nuevos en setiembre, concentró’l 85,5 % de les inscripciones nueves.

Esti enclín confírmase al revisar la situación por conceyos, onde puede vese qu’aquellos con más vinculación cola coxuntura turística son los que concentren los porcentaxes de xubida más elevaos: Cabrales (21,21 %), Cangues d’Onís (24,91 %), Cuideiru (29,75 %), Llanes (29,75 %), Onís (19,05 %) y Ribedeva (38,46 %). «En setiembre, como vien siendo habitual, el fin de la campaña de branu tien el so efectu na medría del paru rexistráu n’actividaes económiques rellacionaes col turismu, como la industria de l’alimentación, el comerciu, los agospiamientos, los servicios de comíes y bebíes o la xardinería», esplicó la directora xerente del Sepepa, Pilar Varela.

Ente los conceyos con más empléu y población, en términos absolutos el paru xubió n’Uviéu en 155 persones (1,11 %), en 115 n’Avilés (+2,12 %) y en 622 en Xixón (+3,24 %). El desempléu baxó en catorce conceyos y creció nel restu. Al respective de la contratación, en setiembre rexistráronse n’Asturies 33.760 allugamientos, un 10,71 % más que n’agostu. D’elles, 3.018 fueron indefiníes, lo que supón una medría del 79,96 %.

Evolución positiva

El paru interanual caltuvo en setiembre una evolución positiva n’Asturies, al rexistrar un descensu del 4,24 % al respective del mesmu mes del añu anterior, lo que supón qu’hai 2.993 demandantes menos inscritos nes oficines del Serviciu Públicu d’Empléu del Principáu (Sepepa). Nos dolce meses últimos, el paru baxó en tolos sectores d’actividá, en dambos sexos y en tolos tramos d’edá, sacante’l colectivu de mayores de 45 años, qu’esperimentó un aumentu leve (0,58 %). Destaquen los retrocesos na industria (-5,65 %), ente les persones ensin empléu anterior (-5,47 %) y, sobre manera, na construcción (-10,78 %). Nestos trés sectores, los descensos superaron la media rexonal.

Tocante a la evolución de l’afiliación a la Seguridá Social, nel añu últimu’l númberu de cotizantes aumentó en 3.967 persones, un 1,09 %, hasta asitiar en 367.641. Por sectores d’actividá, la distribución de les altes llaborales repártese d’esta manera: réxime xeneral (291.517 persones), autónomos (73.431 persones), mar (1.536 persones) y minería (1.157 persones).