El patronatu de la Fundación La Llaboral, Centru d’Arte, Creación Industrial y Promoción Cultural aprobó güei les bases pa la convocatoria del puestu de la dirección-xerencia del Centru d’Arte y Creación Industrial. Estes bases, que primero foron treslladaes a la comisión científica pa que l’órganu asesor fixere les aportaciones oportunes, van publicase nos díes vinientes nel Portal de Tresparencia del Principáu, en Trabajastur y na web de la fundación, amás d’en revistes especializaes y en sitios electrónicos nacionales y internacionales del mundu de les artes.
La convocatoria pa la provisión del puestu, pa una duración de cinco años prorrogables, especifica que la persona axudicataria va exercer la máxima responsabilidá de la dirección y xestión de la fundación, namás subordinada a los determinos que tomen los órganos de gobiernu (patronatu y comisión executiva) y asesorada pola comisión científica. Amás, pal desempeñu de les sos funciones va cuntar col sofitu de la plantiya de la fundación y les empreses nes que s’esternalicen determinaos servicios.
Les funciones concretes del puestu son estes:
Exercer la xerencia de la Fundación La Llaboral, Centru d’Arte, Creación Industrial y Promoción Cultural, executando los alcuerdos adoptaos pol patronatu y la comisión executiva:
- Coordinar y dirixir el personal adscrito al centru y los servicios dependientes de la fundación.
- Actuar como órganu de contratación, dientro de les llendes y autorizaciones que-y otorgue’l patronatu.
- Ellaborar los presupuestos anuales d’ingresos y gastos del centru.
- Favorecer la captación de recursos p’ayudar a la sostenibilidá económica del centru al traviés de la xestión d’ayudes nacionales, europees o internacionales, y al traviés de patrocinios y mecenatu.
Exercer la dirección artística de la fundación, con actuaciones como estes:
- Proponer al patronatu les actuaciones a realizar.
- Liderar el desenvolvimientu d’un discursu teóricu nel marcu del proyectu de Llaboral.
- Fomentar formes nueves d’investigación y producción.
- Desenvolver la estratexa programática y de creación d’audiencies.
- Ellaborar el programa anual d’actividaes de caúna de les árees: esposiciones, residencies de producción y investigación, educación y programa públicu.
- Ellaborar y coordinar la estratexa de comunicación.
- Fomentar rellaciones de cooperación y intercambéu con otres entidaes y instituciones culturales, educatives o científiques a nivel local, nacional y internacional y establecer redes de collaboración. Va ponese una atención especial al fortalecimientu de rellaciones del centru cola redolada artística y cultural asturianu.
- El procesu selectivu va constar de trés fases: valoración de los méritos alegaos poles persones aspirantes, ellaboración y presentación escrita d’un proyectu y entrevista d’evaluación y defensa del proyectu.
El xuráu encargáu d’evaluar les propuestes va tar formáu por estos integrantes:
- Dos miembros del patronatu de la fundación.
- Trés persones integrantes de la comisión científica.
- Una persona esterna perteneciente al ámbitu artísticu y cultural, con esperiencia en llabores de dirección artística nuna institución rellacionada colos oxetivos y finalidaes de Llaboral, que va ser nomada pol patronatu a propuesta de la comisión científica.
- Tola información relativa a les pruebes va publicase na web de la fundación: www.laboralcentrodearte.org
