La conseyera de Presidencia, Rita Camblor, consideró un exemplu de “eficiencia, coordinación y collaboración” el simulacru d’emerxencia énte un riesgu químicu que se realizó güei nes instalaciones de Fertiberia, n’Avilés. “La resultancia foi tou un éxitu, magar les dificultaes que suponía coordinar a más de 200 efectivos procedentes d’una ventena d’entidaes distintes”, aseguró.
Camblor, que tuvo al frente del operativu y en contactu permanente con técnicos del Serviciu d’Emerxencies del Principáu d’Asturies (SEPA), aseguró que, a falta d’un analís más refechu de les resultancies que van poder indicar posibles llinies de meyora, “el simulacru cumplió l’oxetivu fundamental del exerciciu”.
“La operatividad del Plan d’Emerxencia Esterior de la empresa, sobremanera no que se refier a la efectividá en tomar de decisiones y coordinación ente toos los intervinientes, quedó perfectamente acreditada, polo que toos tenemos de felicitanos poles resultancies”, aseguró.
Tamién destacó que los tiempos de respuesta fueron los óptimos, la capacidá d’intervención, l’afayadiza, y la resultancia d’activar per primer vez ell sistema acústicu d’avisu a la población énte un accidente grave nun establecimientu industrial, bien bonu. Nesti casu, dende’l centru de control allugáu del SEPA en La Morgal, namása se remanó una de les serenes que sollerten a los habitantes de les zones afectaes pa que pongan en marcha midíes d’autoprotección como’l confinamientu.
La rede consta de 28 serenes allugaes estratéxicamente y el so soníu, tanto’l d’entamu como’l de fin de l’alerta, cubre les árees d’intervención de les hipótesis accidentales contemplaes nos analises de riesgu de los distintos establecimientos.
Planes autoprotección
La puesta en práctica de los planes d’autoprotección de dos centros escolares de la zona, el Colexu Públicu de Llaranes y la’Escuela Superior d’Arte de Valliniello, qu’asemeyaron el confinamientu del alumnáu y del personal, tamién fueron valoraos.
La conseyera de Presidencia estimó la collaboración emprestada tanto pola población como poles empreses afectaes pol desenvolvimientu del simulacru y sorrayó la importancia d’estos eventos pa poder encarar emerxencies reales.
L’exerciciu, entamáu pol SEPA en collaboración con Fertiberia, duró dos hores y participaron nél 200 persones de casi una ventena d’organismos y entidaes, ente otros, les conseyeríes de Presidencia, Alministración Autonómica, Industria, Salú y Educación; la Delegación de Gobiernu; el Conceyu d’Avilés; la Guardia Civil; les policías Nacional y Local; dellos servicios sanitarios como SAMU-Asturies y Cruz Bermeya bomberos de la empresa ArcelorMittal, y voluntarios de les agrupaciones de Protección Civil d’Uviéu, Cabranes, Mieres, Siero, Llanera, Tinéu y Cangas.
Hipótesis accidental
La hipótesis accidental cola que se trabayó foi una fuga d’amoniacu pol frayatu parcial de la llinia de salida no fondero d’una de les esferes de la planta d’almacenamientu de la empresa. Por cuenta d’ello, produciríase una nube tóxica que s’espardería n’atmósfera y resultaríen afectaos dos trabayadores nel interior de la instalación y una ventena más nel esterior.
Esti simulacru forma parte del plan de trabayu de la Mesa pa la Implantación de los planes d’Emerxencia Esterior d’Asturies, qu’integren representantes del SEPA y de les empreses Dupont Asturies, ArcelorMittal, Fertiberia, ENCE, HC Enerxía, Industrial, Química del Nalón, Repsol, Compañía Loxística d’Hidrocarburos, Asturiana de Cinc, Galp Distribución Oil España, Petróleos Asturianos y Alu-Iberica.
