El compromisu incluyíu nel presupuestu d’educación pa coles llingües propies d’Asturies ye la estensión de la enseñanza d’asturianu y eonaviego. A partir del cursu 2025-2026, van introducise nel segundu ciclu d’Infantil, pal alumnáu de trés a seis años, dientro de la área de deprendizaxe Comunicación y representación de la realidá. Van tener calter voluntariu. Coles mesmes, dambes llingües van ufiertase por primer vegada nes escueles oficiales d’idiomes. Nesti sentíu, la conseyería planió una implantación progresiva.
Esta política, tal que s’anunciara, requier de la contratación de 104 docentes: 103 pa Infantil y unu pa les escueles d’idiomes.
Nel apartáu d’infraestructures, el próximu cursu va inaugurase’l IES de La Corredoria, n’Uviéu, la mayor inversión que ta executando Educación. L’institutu va cuntar con 24 unidaes: 16 d’ESO y 8 de Bachilleratu; va tener el certificáu de sostenibilidá de 4 fueyes verdes y va disponer de tolos nuevos espacios pedagóxicos (superaules, fueu de campamentu, atriu, etcétera). La conclusión de les obres ta prevista pa finales del primer trimestre. En paralelu, tán dándose tolos pasos necesarios pa inaugurar el centru, dende la so creación alministrativa a la organización de la plantiya.
Ente los nuevos proyectos, ta la rehabilitación enerxética integral del Colexu Públicu Xovellanos, d’A Veiga, anunciada fai unes selmanes. Pa 2025 va cuntar con una partida de 450.000 euros que va dexar empecipiar los trabayos.
Amás, caltiénense otres obres, como’l Centru Integráu de Formación Profesional (CIFP) de La Grandiella y la segunda fase de la Escuela d’Artes, dambos n’Avilés, o’l centru d’educación especial de Montecerráu, n’Uviéu. Al tiempu, sigue la construcción del colexu de Nuevo Roces, en Xixón.
