El V Congresu Mundial d’Asturianía, el primeru que va tener llugar fuera d’Asturies, va celebrase en Bonos Aires (Arxentina) col lema AsturiES plural cola participación de 35 centros y cases d’Asturies de tol mundu y cerca d’un centenar de participantes.
La directora xeneral d’Emigración y Polítiques de Torna, Olaya Romano, definió’l congresu como “un foru d’intercambiu y diálogu que dexa avanzar conxuntamente nel futuru de l’asturianía”. Amás, destacó que la incorporación de nueves entidaes a la rede de centros con reconocencia d’asturianía reflexa la so vitalidá y capacidá de crecimientu. Nesta edición súmense per primer vegada los centros de Lanús y Rosario, que yá participaren nel anterior congresu, pero entá nun disponíen de la reconocencia.
“La continua incorporación de nueves entidaes a la rede de centros con reconocencia d’asturianía demuestra l’impulsu y dinamismu de los equipamientos asturianos nel esterior y el compromisu del Gobiernu d’Asturies cola comunidá repartida pel mundu”, señaló Romano.
La elección de Bonos Aires como sede cobra especial relevancia polos fondos venceyos históricos ente Asturies y Arxentina. El país concentra’l mayor númberu d’emigrantes asturianos, con cerca de 31.000 persones, y cunta con catorce centros asturianos, la rede más estensa fuera d’España.
El Congresu Mundial d’Asturianía constitúi’l principal espaciu d’alcuentru de la comunidá asturiana nel esterior. Mientres la so celebración, representantes de centros, entidaes y instituciones van compartir esperiencies, van analizar los retos de futuru y van aldericar propuestes pa fortalecer los llazos ente Asturies y la emigración.
El comité organizador y el comité científicu trabayen yá na definición del programa, les ponencies y los conteníos del alcuentru, en coordinación colos mesmos centros asturianos participantes.
El comité organizador ta presidíu pola vicepresidenta del gobiernu asturianu, Gimena Llamedo, y tamién formen parte del mesmu Olaya Romano; la presidenta del Conseyu de Comunidaes Asturianes, María Antonia Fernández Felgueroso; el presidente de la Federación Internacional de Centros Asturianos (FICA), Manuel de Barros Canuria; Marcelino Fernández Raigoso, en representación de la Universidá d’Uviéu; Pilar Simón, pol Centru Asturianu de Bonos Aires; Emilio Álvarez, pol Centru Asturianu de Lausana; Valentín Martínez-Otero, pol Centru Asturianu de Madrid; Reyes Ceñal, en nome de Compromisu Asturies XXI; Alberto González, por Fade; Úrsula Slzalata, por Comisiones Obreres, y Juan José Iglesias, por UXT.
Anguaño esisten 45 centros asturianos activos en tol mundu, de los que 21 atópense n’España y 24 nel estranxeru.
