Les esportaciones asturianes al Golfu Pérsicu aumenten en 24,7% no que va d’añu, magar la inestabilidá y la crisis d’Ormuz
La inestabilidá n’Oriente Mediu y el conflictu pol estrechu de Ormuz nun frenen por agora les ventes de les empreses asturianes a esta zona. Según los últimos datos oficiales analizaos por Asturex, les esportaciones al Golfu Pérsicu algamaron los 155,22 millones nos ocho primeros meses del añu, un 24,73% más respectu al añu pasáu, polo que nun s’aprecia un impactu negativu del conflictu sobre’l comerciu esterior. Trátase, amás, del volume de ventes más altu nesti periodu dende 2021.
El mes d’agostu confirmó esta solidez y les ventes a la Península Arábiga asitiáronse en 23,24 millones, un 136,72% más que l’añu anterior. Arabia Saudita consolídase como’l destín principal de les operaciones na zona, al concentrar el 85,4% de les ventes d’agostu. Nel acumuláu del añu, esti mercáu saudín crez percima del 122% y suma 97,34 millones, mientres que Emiratos Árabes Xuníos ocupa la segunda posición con 38,41 millones.
Por sectores, el cinc actúa como’l gran motor comercial de les esportaciones a esta zona. Les ventes d’esti mineral y les sos manufactures atropen 96,76 millones, cifra que representa’l 62,3% del total esportáu por Asturies. De segundes, destaquen les máquines y aparatos mecánicos, con ventes de 29,83 millones, un 78% más. Al respective de la base empresarial, Emiratos Árabes Xuníos cunta con 25 empreses esportadores regulares, mientres qu’Arabia Saudita rexistra 17 firmes con actividá comercial recurrente.
A nivel global, les esportaciones totales d’Asturies sumaron 3.644,9 millones ente los meses de xineru y agostu. Solo nesti últimu mes, la comunidá esportó productos per valor de 464,7 millones, un 15% más. Amás, el músculu empresarial fortalecióse al rexistrar cerca de 650 esportadores regulares.
