El Gobiernu d’Asturies punxo güei en marcha la unidá de convalecencia de la residencia Mista, en Xixón, tres una inversión próxima a los 264.000 euros. Esti dispositivu va dexar ufiertar una atención fayadiza a persones mayores que, en recibiendo l’alta hospitalaria, riquen curiaos más complexos que los que se garanticen nuna plaza temporal d’un recursu sociosanitariu.
La conseyera de Derechos Sociales y Bienestar, Melania Álvarez, visitó esta mañana esti recursu, allugáu na quinta planta del centru polivalente de recursos, que va empezar a funcionar con 15 places y progresivamente va llegar a ufiertar 26. Esta residencia, la mayor d’Asturies, va cuntar con un equipu de 18 profesionales: 6 enfermeres y 12 técnicos auxiliares d’enfermería para atender a les persones ingresaes na nueva unidá. Los pacientes tamién van disponer d’atención médica y asistencia per parte de trabayadores sociales y d’otros profesionales que yá empresten serviciu nel centru.
El procesu de valoración pal ingresu na unidá va empezar esta selmana y les persones mayor que la precisen van poder aportar darréu a esti nuevu serviciu.
“La unidá supon una meyora fundamental na meyora de la calidá asistencial y un exemplu más del compromisu del Gobiernu d’Asturies cola protección y el cuidu de les persones más vulnerables”, destacó Melania Álvarez. Al so xuiciu, la creación d’esti dispositivu, prevista nel Plan Sociosanitariu del Principáu, supon tamién un bon exemplu de la fayadiza coordinación ente los servicios sanitariu y social de la comunidá.
