El Principáu reintrodució truches autóctones adultes nel cotu de pesca del banzáu de Los Alfilorios, en Morcín, coles mires d’impulsar la rexeneración piscícola y restablecer l’equilibriu natural. Esta midida llevóse a cabu en collaboración coles sociedaes de pescadores La Socala, Amigos del Nalón y Real Asturiana de Pesca, mesmo que colos conceyos d’Uviéu y Morcín.
Esta actuación dexa reponer de forma controlada la tasa d’estracción de truches que supón la pesca. Los exemplares, de gran talla, suponen amás un reclamu adicional pa quien practique esti deporte polo espectacular del so llance y la posibilidá d’utilizar artes difíciles de practicar nos cursos fluviales pola so angostura.
En 2020 retomóse l’actividá regulada nesta zona, al traviés de cotu de pesca tradicional. La pesca deportiva puede realizase de marzu a agostu, con un númberu llimitáu de cinco pescadores diarios, según lo establecío nes normes añales.
Mediu Natural va estender esti tipu d’acciones a otros banzaos de la comunidá, en collaboración coles sociedaes de pescadores y otres entidaes collaboradores, de forma que sirva pa poner en valor estos depósitos d’agua, que tamién alluguen una importante avifauna y una gran biodiversidá.
Los exemplares de trucha reintroducíos vienen de les sociedaes collaboradores de pesca del Principáu. Trátase d’exemplares que s’atopen nel so tramu final reproductivu y nun tienen de ser lliberaos nos cursos fluviales porque interfieren na dinámica poblacional de los ríos.
