El Gobiernu d’Asturies sacó güei a información pública la Estratexa de Gobernanza Pública del Principáu, que podrá consultase hasta’l 23 d’avientu nel portal www.asturiasparticipa.es. Nesi periodu recoyerán les aportaciones de la ciudadanía al documentu, qu’apuesta por una xestión más innovadora, eficiente ya inclusiva.
El testu Estratexa de Gobernanza Pública del Principáu d’Asturies: 100 midíes para llograr un gobiernu abierto y uno Alministración eficaz y responsable ye una de les iniciatives de tresparencia, participación y collaboración impulsaes pol Executivu autonómicu. Ente otros oxetivos, pretende treslladar a la población lo que supón cuntar con un gobiernu abiertu, amás d’esponer conceptos como la democracia alministrativa.
“El documentu propón una nueva visión de l’Alministración y una serie de midíes pa llevar a cabu esa tresformación, ente les que destaquen la ética pública, el gobiernu abiertu, la rindición de cuentes, la modernización del sector públicu, la igualdá y la cohesión social”, esplica’l director xeneral de Gobernanza Pública, Tresparencia, Participación Ciudadana y Axenda 2030, José Antonio Garmón.
En concreto, el borrador plantega cinco oxetivos estratéxicos, que se van desenvolver en 10 llinies d’actuación y un centenar de midíes concretes. Los oxetivos estratéxicos son los siguientes:
- Enfotu y ética pública.
- Ciudadanía política y alministrativa.
- Bon gobiernu, bona alministración y bona regulación.
- Cultura del cambéu, modernización y nuevu modelu de xestión pública.
- Desenvolvimientu social sostenible: Igualdá y cohesión social.
La estratexa estructúrase en delles partes, la primera, introductoria, que s’articula nel marcu conceptual denomináu Referencia, contestu y diagnósticu normativu, visión y valores, y nun marcu de gobernanza pública, pa dar pasu de siguío a la esposición central, titulada: Meta principal: una gobernanza pública integrada, innovadora, eficaz, eficiente ya inclusiva como piedra angular de la nueva xestión pública.
L’apartáu Evaluación de la Estratexa de Gobernanza Pública, asitiáu a la fin del documentu, fai referencia a los preseos de siguimientu y analís ya inclúi la participación ciudadana nesi procesu, col fin de conocer la so opinión, les sos necesidaes y el so grau de conformidá col procesu de cambéu na xestión pública qu’implica la mesma estratexa.
