El Gobiernu d’Asturies sacó a llicitación por 1.952.188 euros les obres de dragáu y construcción d’un muelle nuevu nel puertu de Lluanco (Gozón). Esta actuación, que tien un plazu d’execución de nueve meses y mediu, cuenta con financiación de la Unión Europea al traviés del Fondu Européu Marítimu y de Pesca. El plazu pa presentar ufiertes remata’l 25 de payares.
Les obres van consistir nel dragáu del muelle, que va algamar un caláu mínimu de 3 metros, y na construcción d’un muru de formigón de 100 metros de frente. Esti muru va tar formáu por una base de formigón encimentada sobre la turria del dragáu y dos sofitos estructurales de formigón armáu. Va tener un anchor máximu de cinco metros y va permitirla descarga de pexe y la carga de persones, apareyos y enseres de forma eficiente, segura y ensin interferencies con otres actividaes del puertu.
Amás, sobre esti muru instalaráse un surtidor de combustible pa les embarcaciones profesionales con capacidá pa 20.000 llitros. El proyectu tamién prevé l’allugamientu de bolardos, arquetes de suministru, escales auxiliares, boques de riegu y cinco lluminaries.
