El Gobiernu d’Asturies sofita 31 proyectos nel grupu de desenvolvimientu rural Asociación para’l Desenvolvimientu Integráu del Centru d’Asturies periurbano (ADICAP) con 907.036 euros, al traviés de la última convocatoria del programa Leader. Trátase d’iniciatives d’empreses, entidaes locales y ensin ánimu d’arriquecimientu, que suponen una inversión de 2.118.244 euros y céntrense nos conceyos de Carreño, Corvera, Gozón y Llanera.
La directora xeneral de Desenvolvimientu Rural y Agroalimentación, Begoña López, visitó güei en Gozón dos iniciatives que recibieron ayudes Leader, la de turismu rural Casa d’aldega 3 Trisqueles, en Santana, y la empresa agrícola familiar Cultivos Cardín, en Cardu. Estes subvenciones, cofinanciaes pola Unión Europea al traviés del Fondu Européu de Desenvolvimientu Rural (Feader), dan soporte al texíu granible y social del mediu rural y garanticen la continuidá de l’actividá nun sector esencial pal suministru d’alimentos.
El Gobiernu d’Asturies moviliza anguaño na zona rural casi 44 millones al traviés d’estes ayudes. A la última convocatoria, agora n’execución, destínense 22.684.304 euros pa sofitar 631 proyectos, de los cualos 429 correspuenden a empreses privaes, 142 a entidaes locales y 60 d’asociaciones ensin ánimu d’arriquecimientu.
A esta cantidá suman los 16,5 millones de la convocatoria de 2022. Les subvenciones consoliden la crecedera del 40% na ayuda p’autónomos (el conocíu como ticket rural) hasta los 35.000 euros, y simplifiquen los trámites alministrativos col fin de flexibilizar les condiciones p’aportar les ayudes.
Les ayudes del programa Leader concédense al traviés de los once grupos de desenvolvimientu rural, que tomen la práctica totalidá del territoriu asturianu y a los que’l Principáu destinó 4.423.475 euros pa sufragar gastos de caltenimientu.
