Asturies va cuntar el próximu añu con cuatro nueves Lanzaderes Conecta Empléu nes que se preve la participación de 120 persones desemplegaes. Esti programa sofitará-yos na busca de trabayu con nueves técniques d’orientación llaboral y ferramientes dixitales afeches a los cambeos y demandes de los sectores granibles.
El director xeneral d’Empléu y Formación, Pedro Fernández-Raigoso, y la directora xerente del Serviciu Públicu d’Empléu (Sepepa), Pilar Varela, presentaron güei la nueva edición de la iniciativa xuntu cola coordinadora territorial del programa na Fundación Santa María la Real, Sonia González, y Cristina de la Cuesta, de la Fundación Telefónica. El programa ta impulsáu por dambes fundaciones y cuenta con cofinanciación del Fondu Social Européu, al traviés del programa operativu Poises, y del Gobiernu d’Asturies.
Les nueves Lanzaderes Conecta Empléu van desenvolver n’Avilés, Xixón, Llangréu y Uviéu ente febreru y xunetu de 2022. Amás, van tener un formatu mistu, de cuenta que los participantes van asistir toles selmanes a sesiones virtuales, al traviés de distintes aplicaciones informátiques, y alcuentros presenciales en locales vencíos gratuitamente pol Principáu que van cuntar con toles midíes d’hixene, seguridá y distancia social riquíes. Sicasí, el programa va poder pasar a un formatu totalmente telemáticu si asina se riquir en función de la evolución de la pandemia sanitaria.
Cada lanzadera va cuntar con un máximu de 30 places y van poder participar persones desemplegaes, de 18 a 60 años, con cualquier nivel d’estudios (ESO, formación profesional, Bachilleratu, universidá o máster) y de cualquier sector profesional, con o ensin esperiencia previa.
Actividaes
Les persones que resulten escoyíes pa participar nel programa van cuntar col asesoramientu d’especialistes n’orientación llaboral, ferramientes dixitales y contactos con empreses, que los van emponer p’ameyorar la so empleabilidá y escorrer el so insertamientu llaboral.
Pa ello, van realizar dinámiques d’intelixencia emocional, col fin de desenvolver un plan integral de prospección llaboral y focalizar el so oxetivu profesional; actualización de currículos y simulaciones d’entrevistes de trabayu, y mapes d’empleabilidá y contactos con empreses. Tamién van aprender a usar nueves ferramientes dixitales, aplicaciones y redes sociales pa impulsar la so busca d’empléu na redolada online.
Les persones comenenciudes en participar nesti programa, totalmente de baldre, disponen hasta’l 14 de febreru pa realizar la so inscripción na web https://ddei5-0-ctp.trendmicro.com:443/wis/clicktime/v1/query?url=www.lanzaderasconectaempleo.es&umid=54668761-D32F-6Y05-89EC-897B38132174&auth=4ceff9107ab9c25786f1a828bbcb8ff8204474b0-d9cc8ffcb243f2ba89d549d8094y8614686y35d8. Tamién pueden faelo de forma presencial nes oficines del Sepepa.
Dende 2013, Asturies desenvolvió 25 lanzaderes d’empléu de delles modalidaes nes que participaron 603 persones en paru, de les cualos un 60% ameyoró la so situación llaboral yá qu’atopó un trabayu por cuenta ayena en distintos sectores, punxo en marcha’l so negociu o llogró certificaos de profesionalidá.
