a conseyera de Presidencia, Rita Camblor, y la secretaria de Política Social y LGTBI de UXT Asturies, Ana Isabel García Raspia, alcordaron güei aunir esfuerzos contra los delitos d’odiu y la discriminación de les persones pola so orientación sexual nel ámbitu llaboral. Dambes amosaron la so esmolición pola xuba de la LGTBIfobia y coincidieron na necesidá d’ufiertar una respuesta contundente de condena énte esti tipu de fechos.
Camblor treslladó a la representante del sindicatu la so esmolición pola complicada situación de les persones LGTBI nel mundu llaboral, que se pon de manifiestu nel fechu de qu’el 90% considera la so orientación o identidá sexual un inconveniente a la hora d’atopar trabayu. Amás, cuatro de cada diez persones transexuales aseguren que fueron refugaes n’entrevistes llaborales, tal que reflexa un recién estudiu nacional realizáu por UXT.
La conseyera informó de que la próxima xunta del Observatoriu contra la LGTBIfobia va celebrase’l martes, 18 de xineru. Nesi alcuentru espondrán les prioridaes p’anguaño nes polítiques LGTBI. “L’oxetivu común ye consiguir una sociedá inclusiva dafechu, na que imperen valores como la llibertá, la igualdá y la solidaridá, y na que l’aspeutu esterior de les persones, la so orientación o identidá sexual nun cunten más que la so capacidá y la so competencies a la d’aportar a un empléu o de rellacionase colos sos compañeros y compañeres”, sorrayó’l titular de Presidencia.
Camblor recalcó que, frente al aumentu de los delitos d’odiu, el Principáu nun va permanecer impasible y va presentar llueu un proyectu de llei LGTBI propiu, que garantice los derechos del colectivu y les sos families nel Principáu.
“Desque asumimos les competencies de les polítiques LGTBI, marquemos l’oxetivu de collaborar con toles organizaciones comprometíes col reconocimientu social y xurídico del derechu a vivir d’alcuerdu cola orientación y identidá sexuales propies, ensin que puedan ser reprimíes o coartaes en nengún ámbitu de la vida. Esi ye’l nuesu compromisu y queremos cuntar coles mayores aliances posibles pa llogralo”, añedió la conseyera.
