El conflictu pola reconocencia del profesoráu d’asturianu vuelve intensificase. La falta de concreción del Ministeriu d’Educación, Formación Profesional y Deportes llenó la paciencia del colectivu docente.
El pasáu llunes fíxose pública la rempuesta del Ministeriu a la iniciativa parllamentaria presentada pol diputáu de Sumar, Rafael Cofiño, sobre la posibilidá de modificar la normativa estatal pa permitir la creación d’especialidaes docentes en llingües con protección llegal como l’asturianu y l’eonaviegu. Sicasí, lloñe d’esclariar la so postura, el Ministeriu caltién una rempuesta ambigua, ensin compromisos concretos nin plazos definíos.
Dende’l colectivu docente alvierten de qu’esta falta de meyores nun ye namás una cuestión alministrativa, sinón que tien consecuencies directes nes condiciones llaborales del profesoráu: “Facemos el mesmu trabayu y tenemos la mesma formación que’l restu de docentes, pero nun cuntamos colos mesmos derechos llaborales”.
Esta evasiva del Ministeriu llega, amás, meses dempués de la xunta caltenida ente l’asociación de docentes ADAE y la Conseyería d’Educación. Hai que recordar que’l pasáu mes de xunetu’l Gobiernu del Principáu comprometióse, al traviés del pactu “Asturias Educa”, a negociar esta cuestión col Ministeriu, ensin qu’hasta la fecha se produxere una xunta cola nueva ministra, Milagros Tolón.
Nel ámbitu sindical, CCOO solicitó formalmente una xunta col Secretariu d’Estáu d’Educación, mientres que dende Sumar anunciaron que van impulsar tamién un alcuentru col Ministeriu en próximes feches. Anque’l profesoráu valora estos movimientos, considera que siguen siendo insuficientes énte l’ausencia de meyores reales.
Por ello, el colectivu docente encamienta al presidente d’Asturies, Adrián Barbón, a implicase de forma más activa y a defender con mayor firmeza esta reivindicación énte’l Gobiernu central, evitando que’l conflictu siga cronificando.
Énte esti escenariu, el profesoráu anuncia l’entamu d’una nueva campaña de recoyida de firmes na plataforma Change.org pa visibilizar el conflictu y aumentar la presión institucional. Coles mesmes, alvierte de que, si nos próximos díes nun se concreten midíes, feches o compromisos claros, van retomase les movilizaciones.
