El profesoráu de Llingua Asturiana y Eonaviego/Gallego-asturiano da un pasu más na so llucha pola creación de les especialidaes docentes. Dempués de meses de movilizaciones, ADAE (Asociación de Docentes d’Asturianu y Eonaviego/Gallego-asturianu) espubliza un nuevu videu en redes sociales pa reforzar la visibilización del conflictu, al empar que’l colectivu docente entama una nueva fase de presión institucional.
L’asociación espublizó güei a les 12:00 hores nel so perfil d’Instagram un videu pa sensibilizar sobre la situación del profesoráu: una discriminación llaboral que s’estiende dende hai 41 años y que sigue ensin una solución efectiva. El conteníu ta teniendo un importante espardimientu, con miles de visualizaciones nes primeres hores.
Tres la movilización del pasáu 30 de marzu en Madrid, onde’l profesoráu se concentró y presentó per rexistru una solicitú formal en nome d’ADAE, el colectivu da un pasu más. Nesta ocasión, son les y los docentes de manera individual quien tán rexistrando peticiones dirixíes al gabinete de la Ministra d’Educación, Milagros Tolón, col oxetivu d’aumentar la presión institucional y acelerar la solución.
Estes solicitúes reclamen la modificación de los reales decretos d’especialidaes, un pasu imprescindible pa la creación de les especialidaes docentes d’Asturianu y Eonaviego/Gallego asturianu, y pa poner fin a una situación de desigualdá histórica.
Dende’l colectivu docente señalen que son conocedores de que yá esisten contactos ente’l Ministeriu d’Educación y la Conseyería d’Educación d’Asturies, con Eva Ledo al frente. Sicasí, consideren que, tres meses d’esfuerciu, movilizaciones y diálogu, llegó’l momentu de pasar a los fechos y dar una rempuesta definitiva.
Dende ADAE insisten na necesidá de qu’Eva Ledo y Adrián Barbón refuercen el diálogu cola ministra y el so equipu con firmeza y determinación. El profesoráu reclama una solución inmediata, recordando que’l final d’esta situación de discriminación nun pue siguir aplazándose.
Amás, recuerden que d’esta decisión depende tamién el cumplimientu efectivu del Pactu Asturias Educa y la dignificación profesional de más de 300 docentes que lleven décades esperando una solución xusta.