El PSOE de Xixón llamenta que’l gobiernu local anuncie nueves actuaciones p’aumentar la llegada de persones y de turismu en Cimavilla ensin resolver antes los problemes de seguridá, masificación, movilidá o vandalismu, problemes que l’asociación vecinal Gijia denunció en numberoses ocasiones y que’l Conceyu ignora.
Los socialistes faen referencia a la construcción d’una grada na Cuesta del Cholo y a la instalación d’un segundu Paséu Gastro na cai Claudio Alvargonzález de llombu a les vecines y vecinos. “El malestar ente les vecines y vecinos ye creciente. Foro y PP tomen decisiones, pero nun los tienen en cuenta, esto ye, obvien la opinión de quien viven día ente día en Cimavilla. Bon exemplu tamién ye l’entamu de les obres de la plataforma única ensin tener en cuenta cuáles yeren les cais nes que yera prioritario intervenir por cuenta de los desperfectos que presentaben”, aseguró Jacobo López.
El conceyal socialista denuncia asina que Foro y PP adoptaren una deriva qu’amenorga’l derechu a la participación. “Cualquier actuación que se lleve a cabu debería de tar sofitada pol diálogu y el consensu”, añede.
Amás, dende’l PSOE aportunen na necesidá de garantizar una intervención directa de la Policía Local en Cimavilla. El Grupu Municipal Socialista va proponer en Comisión aumentar la presencia d’axentes en zones de mayor conflictu y s’atiendan aquellos requerimientos vecinales, entá ye más dempués de que na madrugada del domingu produxera una importante engarradiella na redolada del Árbol de la Sidra. “Nun ye la primer vegada que pidimos que se refuerce’l dispositivu de seguridá nel barriu énte les conductes incíviques que se producen especialmente nes nueches de les fines de selmana y festivos, pero la conceyala de Seguridá, Nuria Bravo, sigue mirando pa otru llau, nun asume la responsabilidá que trai’l so cargu”, sorraya López.
Asinamesmo, los socialistes van pidir la comparecencia los nuevos xefes de la Policía Local y del Serviciu de Bomberos con cuenta de conocer si hai dalgún plan d’actuación previstu na nueche xixonesa y qué cambeos van proponer en cada área respectivamente p’asegurar una respuesta afayadiza tanto en Cimavilla como nel restu del conceyu.
