El voceru municipal d’Izquierda Xunida nel Conceyu de Xixón, Javier Suárez Llana, propunxo esta mañana afrontar el cambéu del Plan Especial de Reforma Interior de Cimavilla en paralelu al plan d’inversiones col que’l Gobiernu local anunció que va optar a financiamientu de fondos FEDER.
Suárez Llana valora positivamente que se busque “un enfoque integral que sirva p’afrontar les necesidaes del barriu y abandónese la dinámica d’intervenciones parciales que se viniera calteniendo hasta agora, venceyaes amás na so mayoría a la promoción turística”. Sicasí, considera que “ensin el cambéu del PERI, el Plan d’Actuación Integráu anunciáu güei ta incompletu; a la propuesta del Gobiernu fálta-y una pieza fundamental”.
Nesti sentíu, el voceru d’IX señaló que’l cambéu de la normativa urbanística “ye imprescindible p’afrontar una nueva ordenación integral de Cimavilla que resuelva problemes ya introduza nuevos usos del suelu p’acabar col monocultivu turísticu y hosteleru nel barriu. La finalidá de les ayudes FEDER – sigue Suárez Llana – ye promover un desenvolvimientu urbanu sostenible qu’ameyore la calidá de vida de les vecines y los vecinos, y pa eso non solo faen falta inversiones, sinón tamién una regulación urbanística que protexa la vida de barriu y evite convertir Cimavilla nun parque temáticu para’l turismu”.
En cuanto al detalle de les actuaciones conteníes nel proyectu anunciáu pol Gobiernu, el conceyal d’IX manifestó “el prestu” del so grupu al ver incorporaes non solo reivindicaciones vecinales históriques, sinón tamién “propuestes que vinimos faciendo a lo llargo del mandatu y que munches d’elles fueron refugaes polos partíos del Gobiernu nel momentu en que presentar”. Propuestes d’Izquierda Xunida fueron, por casu, la creación d’un centru de mayores nel barriu, la rehabilitación de la Torre del Reló o los planes p’asitiar población nueva nel barriu al traviés vivienda pública d’arriendu algamadizu.
Suárez Llana reivindica tamién otres actuaciones como l’aníu perimetral en plataforma única y la llinia de minibús de EMTUSA, “soluciones a los problemes de movilidá del barriu que formen parte del Plan de Movilidá Sostenible ellaboráu por IX el pasáu mandatu”. “Ta claro que Foro atina y la ciudá gana cuando abandona’l so sectarismu ya incorpora propuestes d’otros grupos, anque antes les refugara”, afirma’l voceru d’IX, que recuerda sicasí que “sigue habiendo una asignatura pendiente colos barrios del sur y del oeste de la ciudá. El gruesu de la inversión municipal sigue concentrándose nel centru y l’este y eso provoca que la desigualdá ente zones de la ciudá siga creciendo”.
